ABŞ Azərbaycanla Ermənistan arasındakı gərginliyi tam dayandırır, ya dondurur?- Türkiyəli professor danışdı
ABŞ Prezidenti Donald Tramp Ermənistanla Azərbaycan arasında münaqişənin tezliklə uğurla və birdəfəlik həll olunacağını bildirib.
Bu barədə amerikalı lider Vaşinqtonda NATO-nun Baş katibi Mark Rutte ilə keçirdiyi mətbuat konfransında deyib.
Onun sözlərinə görə, ABŞ Ermənistanla Azərbaycan arasında münaqişənin həlli üçün səylər göstərib və bu, yaxşı nəticəyə gətirib çıxaracaq.
Azərbaycan Prezidenti İlham Əliyevlə Ermənistan Baş naziri Nikol Paşinyan arasında BƏƏ- də keçirilən görüş sülhüm yaxın zamanda imzalanacağına dair ehtimalı artırır. Çünki hər iki tərəfdən verilən məlumata görə, görüş konstruktiv mühitdə keçib. Bəs ABŞ nə qədər səmimidir?
Bu barədə Crossmedia.az-a danışan türkiyəli politoloq, professor Yaşar Onay deyib ki, Trampın Azərbaycanla Ermənistan arasında sülhün yaxın gələcəkdə mümkün olması barədə bəyanatı ilk baxışdan nikbin diplomatik refleks kimi görünə bilər: "Lakin bu nikbinlik nə regionun tarixi dərinliyini, nə də böyük dövlətlərin strateji hesablamalarını tam əks etdirir. Verməli olduğumuz sual budur: Sülh, həqiqətən, arzu edilir, yoxsa sülh adı altında yeni tarazlıqlar qurulur? Əgər Trampın sülh ritorikası sadəcə bir fasad və ya strateji manevrdirsə və əgər onun davamlı, balanslaşdırılmış sülhə dair real niyyəti yoxdursa, bu vəziyyət həm Azərbaycanın, həm də Türkiyənin uzunmüddətli maraqlarına cavab verir. Çünki məcburi sülh ABŞ-nin marağında olar, lakin region xalqlarının deyil: ABŞ Qafqazı öz geosiyasi gündəliyinə uyğun olaraq balanslaşdırmağa cəhd edə bilər. Belə olan halda, sülh Bakının xeyrinə görünsə də, bu, faktiki olaraq müstəqil qərar qəbul etmək üçün onun regional imkanlarını zəiflədə bilər".
Onun sözlərinə görə, Türkiyənin vasitəçilik rolu kölgədə qala bilər: Türkiyə sülh prosesində həm Azərbaycanın müttəfiqi, həm də regional aktor kimi iştirak etmək istəyir. Lakin ABŞ-nin müdaxiləsi halında proseslər fərqli istiqamətə keçə, Ankaranın təsir imkanlarını məhdudlaşdıra bilər.
Və məcburi sülh kövrəkdir: Davamlı sülh tərəflərin iradəsinə və qarşılıqlı etimada əsaslanmalıdır. Xarici təzyiqlə əldə edilən “sülhlər” çox vaxt münaqişələri həll etmir, dondurur".
Kənan Novruzov
21:04 15.07.2025
Oxunuş sayı: 3616
