Fransa Avropada 2030-cu ilədək genişmiqyaslı silahlı münaqişə ehtimalını yüksək qiymətləndirir
Fransa hökuməti Avropada yaxın illərdə genişmiqyaslı silahlı qarşıdurmanın baş vermə ehtimalının artdığını bəyan edib.
Bu barədə Crossmedia.az “Milli Strateji İcmal – 2025”hesabatına istinadən bildirir ki, sənəddə Fransa ərazisində birbaşa döyüş əməliyyatlarının aparılması ehtimalı az hesab edilsə də, Paris ölkənin bu münaqişəyə müttəfiqləri ilə birlikdə cəlb oluna biləcəyini istisna etmir.
Hesabatda Rusiyanın yaratdığı təhlükə səviyyəsinin görünməmiş həddə çatdığı vurğulanır. Fransız analitikləri təkcə Ukraynaya qarşı yeni hücumun deyil, həm də Moldovada, Balkanlarda potensial münaqişələrin və NATO ölkələrinə qarşı birbaşa təcavüzün mümkünlüyünü qeyd edirlər. Bu kontekstdə Fransa Avropa ölkələrini müdafiə qabiliyyətini gücləndirməyə çağırır. Səbəb kimi isə ABŞ-nin getdikcə daha çox Asiya-Sakit okean bölgəsinə diqqət yetirməsi göstərilir.
Eyni zamanda, sənəddə Ukraynaya dəstəyin Avropanın təhlükəsizliyi baxımından həlledici rol oynadığı qeyd olunur. Paris hesab edir ki, Rusiya ilə müharibənin nəticəsi qitənin gələcəyinə birbaşa təsir edəcək.
Fransanın strateji baxışında Çin də ayrıca yer tutur. Belə ki, sənəddə Pekinin əsrin ortalarınadək dünyanın aparıcı gücünə çevrilmək niyyətində olduğu bildirilir. Xüsusilə, Çin tərəfinin Fransaya məxsus Yeni Kaledoniya adasına və onun zəngin nikel ehtiyatlarına maraq göstərməsi narahatlıq doğurur. Bundan əlavə, Çin iqtisadi və hərbi mövcudiyyətini müxtəlif bölgələrdə genişləndirməklə yanaşı, texnoloji inkişafını da sürətləndirir.
Fidan Qarayeva
20:14 15.07.2025
Oxunuş sayı: 8204
