İran: Nüvə danışıqlarına hazırıq, zənginləşdirmə hüququmuzdan imtina etməyəcəyik
İranın xarici işlər nazirinin müavini Abbas Əraqçı ölkəsinin ABŞ ilə nüvə danışıqlarını bərpa etməyə hazır olduğunu bəyan edib. O, uranın zənginləşdirilməsi fəaliyyətini dayandırmaqla bağlı istənilən tələbi qəbul etməyəcəklərini də açıq şəkildə bildirib.
Crossmedia.az İran mediasın istinadən xəbər verir ki, Əraqçı bu fikirləri Tehranda xarici ölkələrin səfirləri və diplomatik nümayəndələri ilə görüşdə səsləndirib. O, İsrail və ABŞ tərəfindən BMT-nin Nüvə Silahlarının Yayılmaması Anlaşması çərçivəsində nəzarət edilən İran nüvə obyektlərinə edilən hücumları pisləyib, lakin Beynəlxalq Atom Enerjisi Agentliyi (UAEA) və onun rəhbəri Rafael Qrossinin bu hücumlara münasibət bildirməməsindən təəssüfləndiyini vurğulayıb.
Əraqçı bildirib ki, İran parlamenti UAEA ilə əməkdaşlığın dayandırılması ilə bağlı qanun qəbul etsə də, bu əməkdaşlıq tamamilə kəsilməyib. Bundan sonra İranın Agentliklə əlaqələrinin Ali Milli Təhlükəsizlik Şurası vasitəsilə aparılacağını və hər bir müraciətin milli maraqlar baxımından ayrıca dəyərləndiriləcəyini qeyd edib.
İran rəsmisi ölkəsinin nüvə silahı istehsalına yönəlmədiyini, Ayətullah Əli Xameneinin verdiyi fətvaya əsasən bu istiqamətdə addım atmayacağını da bildirib: “Əgər nüvə silahı hazırlamaq niyyətimiz olsaydı, bunu artıq edərdik. Amma dini və insani dəyərlərimiz belə bir addımı istisna edir”.
Əraqçl ABŞ ilə nüvə danışıqlarının bərpası ehtimalına da toxunaraq bu məqamın indi daha uyğun olduğunu bildirib: “İran hərbi hücumu dəf etdikdən sonra daha güclü bir mövqedədir və danışıqlardan çəkinmir. Müzakirə üçün ən yaxşı zaman məhz indi ola bilər”.
O, danışıqların yalnız İranın nüvə proqramının dinc məqsədli xarakter daşımasına dair təminatlar qarşılığında sanksiyaların aradan qaldırılması mövzusunda aparılacağını bildirib. Əraqçl vurğulayıb ki, İranın ballistik raket proqramı və müdafiə qabiliyyəti danışıqlar mövzusu olmayacaq.
Sonda İran rəsmisi əlavə edib: “Uran zənginləşdirmə hüququmuzun tanınmadığı heç bir razılaşmanı qəbul etməyəcəyik. Hər hansı danışıqlarda bu hüququmuzun qorunmasına tam hörmət göstərilməlidir”.
Mədinə Cəlilova
21:05 12.07.2025
Oxunuş sayı: 846
