İqtisadi,İqtisadiyyat
Beynəlxalq əhəmiyyətli avtomobil yolların işıqlandırılması dəhlizlərin cəlbediciliyini yüksəldə bilər
Azərbaycan əlverişli coğrafi mövqeyi, inkişaf edən nəqliyyat infrastrukturu və beynəlxalq nəqliyyat dəhlizlərində artan rolu sayəsində regionun mühüm logistika və tranzit mərkəzlərindən birinə çevrilir. Ölkənin Şərq–Qərb və Şimal–Cənub nəqliyyat marşrutlarının kəsişməsində yerləş-məsi Avropa ilə Asiya arasında yükdaşımaların genişləndirilməsi, beynəlxalq ticarət əlaqələrinin inkişafı və tranzit potensialının reallaşdırılması üçün əlverişli şərait yaradır. Bu prosesdə Orta Dəhliz, Bakı–Tbilisi–Qars dəmir yolu, Bakı Beynəlxalq Dəniz Ticarət Limanı və Şimal–Cənub beynəlxalq nəqliyyat dəhlizi xüsusi əhəmiyyət daşıyır. Dəmir yolu, avtomobil, dəniz və hava nəqliyyatının qarşılıqlı əlaqələndirilməsi Azərbaycanın multimodal daşımalar sistemində rolunu artırır. Eyni zamanda, gömrük prosedurlarının rəqəmsallaşdırılması, elektron sənəd dövriyyəsi, süni intellekt və logistika proseslərinin avtomatlaşdırılması istiqamətində atılan addımlar tranzit əməliyyatlarının sürətinin və səmərəliliyinin yüksəldilməsinə yeni imkanlar yaradacaqdır.
Bununla belə, müasir infrastruktur təminatın formalaşdırılması, davamlı olaraq həyata keçirilməlidir. Ona görə ki, infrastruktura tələblər zaman keçdikcə dəyişir, cəmiyyət və sənayenin zövq və tələblərinə uyğun təkmilləşir. Bu gün Azərbaycan ərazisində beynəlxalq əhəmiyyətli yolların işıqlandırılması da qarşıda dayanan vəzifələrdən biri kimi qəbul edilə bilər. Şərq-Qərb (Bakı-Qazax istiqaməti, təqribən 500 km) və Şimal-Cənub (Qusar-Bakı-Astara, təqribən 513 km) nəqliyyat dəhlizlərinin Azərbaycandan keçən hissələrində avtomobil yollarının işıqlandırılması hərəkət intensivliyi və təhlükəsizliyi, dəhlizlərin cəlbediciliyi baxımından məqsədəuyğun olardı. Eyni zamanda, bu istiqamətdə günəş panellərinin tətbiqi də mümkündür və nəzərdən keçirilə bilər. Bütün bunlar, həm də, Prezident İlham Əliyevin Türkmən-başıda keçirilən MDB Dövlət Başçıları Şurasının məhdud tərkibdə iclasında çıxışı zamanı bildirdiyi: “Azərbaycan regionun əsas nəqliyyat qovşaqlarından biri kimi mövqelərini davamlı olaraq möhkəmləndirir, Şimal-Cənub və Şərq-Qərb beynəlxalq dəhlizləri boyunca etibarlı tranziti təmin edir” fikirlərindən irəli gələn zərurət kimi də diqqəti cəlb edir. Yolların abadlaşdırıl-ması, işıqlandırılması tranzit cəlbediciliyini artıra bilər ki, Azərbaycanın tranzit potensialının genişlənməsi də, yalnız nəqliyyat sektorunun inkişafı ilə məhdudlaşmır. Bu proses qeyri-neft iqtisadiyyatının şaxələndirilməsinə, yeni investisiyaların cəlb edilməsinə, logistika xidmətləri bazarının böyüməsinə və ölkənin regional iqtisadi əlaqələrdə iştirakının genişlənməsinə də töhfə verə bilər.
Nəticə etibarilə, Azərbaycanın regional nəqliyyat qovşağı kimi mövqelərinin möhkəm-ləndirilməsi infrastruktur layihələrinin davam etdirilməsini, daşıma və tranzit şəraitinin yaxşılaş-dırılmasını, yollarda etibarlı təhlükəsizliyin təmin edilməsini, beynəlxalq əməkdaşlığın genişlən-dirilməsini, rəqəmsal logistikanın inkişafını və tranzit xidmətlərinin rəqabət qabiliyyətliliyinin artırılmasını tələb edir. Bu istiqamətlər üzrə ardıcıl tədbirlər ölkənin tranzit imkanlarını genişləndirə, nəqliyyat sektorunun multiplikativ iqtisadi təsirlərini artıra, Avropa ilə Asiya arasında etibarlı və səmərəli nəqliyyat-logistika mərkəzi kimi inkişafına şərait yarada bilər.
13:30 13.10.2026
Oxunuş sayı: 161
