Peruda mədən işçiləri küçələrə çıxdı – toqquşmalar və yaralılar var
Cənubi Amerika ölkəsi Peruda hökumətin qərarına etiraz olaraq mədən işçiləri kütləvi şəkildə küçələrə axışıb. Aksiyalar zamanı etirazçılarla polis arasında qarşıdurmalar yaşanıb, çox sayda şəxs yaralanıb və saxlanılıb.
Crossmedia.az xarici KİV-ə istinadən xəbər verir ki, etirazlara səbəb, hökumətin 50 mindən çox qeyri-rəsmi mədənçini fəaliyyətlərinə icazə verən müvəqqəti proqramdan çıxarma qərarı olub. Rəsmilərin açıqlamasına görə, bu addım qeyri-qanuni mədənçiliyə qarşı mübarizə məqsədi daşıyır. Lakin qərar ciddi narazılıqlara səbəb olub.
Paytaxt Lima və Ayakucho bölgəsində baş tutan nümayişlər zamanı etirazçılar əsas yolları bağlayıb. Polis aksiyalara gözyaşardıcı qazla müdaxilə edib.
2012-ci ildə tətbiq olunan proqram qeyri-rəsmi mədənçilərin müvəqqəti olaraq hüquqi çərçivəyə salınmasına imkan verirdi. Bu proqram illər ərzində dəfələrlə uzadılıb, lakin qeyri-qanuni mədənçiliyi təşviq etdiyi və ətraf mühitə zərər verdiyi üçün tənqidlərə məruz qalıb.
Mədən birlikləri və həmkarlar ittifaqları bildirirlər ki, proqramın dayandırılması geniş miqyaslı işsizliyə səbəb ola bilər. Mədənçilik Peru iqtisadiyyatının əsas sahələrindən biridir və ölkə dünyanın üçüncü ən böyük mis istehsalçısı hesab olunur.
Mədinə Cəlilova
20:00 12.07.2025
Oxunuş sayı: 6915
