Ankarada AFAD Türkiyə əməkdaşları Azərbaycan FHN adından mükafatlandırılıb
İyunun 23-də Türkiyə Daxili İşlər Nazirliyinin Fövqəladə Hallar İdarəsinin (AFAD) Ankara şəhərindəki mərkəzi binasında Azərbaycan Fövqəladə Hallar Nazirliyinin (FHN) mütəxəssislərinin beynəlxalq attestasiyaya hazırlanmasında iştirak etmiş “AFAD”ın bir qrup əməkdaşının mükafatlandırılması mərasimi keçirilib. Döş nişanlarını türkiyəli ekspertlərə Azərbaycanın Ankaradakı səfiri Rəşad Məmmədov və AFAD-ın rəhbəri Ali Həmzə Pehlivan təqdim ediblər.
Azərbaycanın Türkiyədəki səfiri iki qardaş ölkə arasında çoxplanlı uğurlu əməkdaşlığın mövcud olduğunu vurğulayıb, bu da bütün sahələrdə, o cümlədən təbii fəlakətlərin nəticələrinin aradan qaldırılması və axtarış-xilasetmə əməliyyatları istiqamətində özünü büruzə verir.
“Biz türkiyəli mütəxəssislərin töhfəsini yüksək qiymətləndirir, onların mükafatlandırılmasını Azərbaycan FHN ilə AFAD arasında əməkdaşlıq üçün əlamətdar hadisə hesab edirik”, - deyə diplomatik missiyanın rəhbəri mərasim iştirakçılarına öz adından və Azərbaycanın fövqəladə hallar naziri Kəmaləddin Heydərov adından minnətdarlığını bildirib.
“AFAD”ın rəhbəri A.H.Pehlivan da öz növbəsində iki qardaş ölkə arasında əməkdaşlığın çoxtərəfli dərinləşməsini bildirib.
O, Azərbaycan Fövqəladə Hallar Nazirliyinin axtarış-xilasetmə xidmətinin bir qrup əməkdaşının BMT-nin Humanitar Məsələlərin Əlaqələndirilməsi İdarəsinin (UN OCHA) İNSARAG beynəlxalq attestasiyadan uğurla keçdiyini, attestasiyaya hazırlıq prosesinin isə AFAD ekspertlərinin iştirakı ilə həyata keçirildiyini xatırladıb.
“Biz çox şadıq ki, bu gün qardaş Azərbaycan beynəlxalq attestasiyadan keçmiş mütəxəssis komandalarına malikdir”, - deyə A.H.Pehlivan bildirib.
AFAD rəhbəri daha sonra 2023-cü ilin fevralında baş vermiş zəlzələlərin nəticələrinin aradan qaldırılmasına verdiyi töhfəyə görə qardaş Azərbaycana və şəxsən Prezident İlham Əliyevə minnətdarlığını bildirib və Kahramanmaraşda həyata keçirilən Azərbaycan Məhəlləsi layihəsini yüksək qiymətləndirib. (Azərtac)
08:16 24.06.2025
Oxunuş sayı: 8149
