Ərəb rəsmiləri: “İran rejiminin sonu yaxınlaşır”
“Bloomberg”-in xəbərinə görə, İsrailin son zərbələrindən sonra İranda mövcud rejimin davam etməsi, hətta ali dini lider Əli Xameneyi sağ qalsa belə, olduqca qeyri-mümkün görünür.
Crossmedia.az xarici KİV-ə istinadən xəbər verir ki, Ərəb rəsmilərindən birinin sözlərinə görə, İranın nüvə proqramının dayandırılması və ya məhv edilməsi onun ölkəsi üçün müsbət haldır. Lakin o, İranda zorakılıq yolu ilə hakimiyyət dəyişikliyinin əleyhinə olduğunu vurğulayıb.
Agentliyin məlumatına görə, bəzi Körfəz ölkələri İsrailin mümkün addımlarından əvvəlcədən xəbərdar olsalar da, Baş nazir Benyamin Netanyahunun ABŞ ilə paralel danışıqlar fonunda İrana zərbə endirməsi onlar üçün gözlənilməz olub. Mənbələr qeyd ediblər ki, region Donald Trampın İsrail rəhbərliyinə təsirini yüksək qiymətləndirir.
Körfəz ölkələri İranın mümkün cavab addımlarından, xüsusilə neft infrastrukturlarına hücumlar və su təchizatı ilə bağlı təhdidlərdən narahatdırlar. Onlar İranın Buşehrdə yerləşən nüvə elektrik stansiyasının zədələnəcəyi təqdirdə yaranacaq radioaktiv çirklənmədən ciddi şəkildə ehtiyat edirlər.
Xatırladaq ki, bu ölkələr əvvəllər yeni nüvə sazişinin imzalanacağı ümidi ilə İrana milyardlarla dollar sərmayə qoyublar.
S&P Global-ın hazırladığı hesabatda bildirilir ki, bölgədə münaqişənin kəskinləşməsi ciddi iqtisadi risklər doğurur. Hesabatda logistik axsamalar, enerji qiymətlərində qeyri-sabitlik, turizm sahəsində zəifləmə, kapital axını və təhlükəsizlik xərclərinin artması mümkün ssenarilər kimi göstərilib.
08:20 20.06.2025
Oxunuş sayı: 8871
