Vyanada İsrailin hərbi əməliyyatlarına qarşı etiraz aksiyası keçirilib
Avstriyanın paytaxtı Vyanada İsrailin Fələstin və İrana qarşı hücumlarına etiraz əlaməti yürüş təşkil olunub.
Crossmedia.az xəbər verir ki, nümayiş iştirakçıları Fələstin və İran bayraqları ilə şəhərin əsas prospektlərindən biri olan Mariahilfer Strasseda toplaşaraq “Azad Fələstinə”, “Qəzzada soyqırıma yox” və “Əllərinizi İrandan çəkin” kimi şüarlar səsləndiriblər.
Etirazçılar beynəlxalq ictimaiyyəti İsrailin hərbi siyasətinə qarşı daha prinsipial və qətiyyətli mövqe sərgiləməyə çağırıblar.
Təşkilatçılardan biri bildirib ki, müxtəlif din və etnik mənsubiyyətlərdən olan insanlar ədalətsizliyə qarşı birgə etiraz etmək üçün aksiyaya qatılıblar:
“Gündəlik yayımlarda təcavüzkarın kim olduğu açıq görünür, lakin bir çox hökumət bu zülmə qarşı səssiz qalır”.
O, Qəzzada 50 mindən çox fələstinlinin həyatını itirdiyini qeyd edib və onların terrorçu kimi təqdim edilməsini qəbuledilməz sayıb.
04:36 20.06.2025
Oxunuş sayı: 8748
