Təl-Əvivdə qanlı səhər – İran xəstəxananı bombaladı
İran və İsrail arasında silahlı münaqişə artan intensivliklə davam edir. Müharibənin 7-ci günündə tərəflər arasında hücumların miqyası genişlənib. İran səhər saatlarında İsrailin Təl-Əviv şəhərinin cənubundakı ən böyük xəstəxananı hədəfə alıb.
Crossmedia.az xəbər verir ki, hücum nəticəsində azı 50 nəfərin xəsarət aldığı bildirilir. Hədəfə alınan tibb müəssisəsi ərazisində ciddi dağıntılar yaranıb, hadisə yerinə təcili tibbi və xilasedici briqadalar cəlb olunub.
Qeyd edək ki, münaqişə İsrailin iyunun 13-də İranın müxtəlif şəhərlərində yerləşən nüvə obyektlərinə və hərbi komandanlığa qarşı genişmiqyaslı hücumları ilə alovlanıb. Bu hücumlara cavab olaraq İran silahlı qüvvələri "Real Promise 3" əməliyyatı çərçivəsində İsrail ərazisinə qarşı 15-ci raket dalğasını başladığını açıqlayıb.
Hər iki tərəfin raket zərbələri nəticəsində mülki yaşayış məntəqələri və strateji infrastruktur hədəfə alınır. Müharibənin başladığı gündən bəri yüzlərlə insan yaralanıb, ölənlərin də olduğu bildirilir.
Bölgədə vəziyyətin daha da gərginləşdiyi bir vaxtda Rusiya Federasiyası Tehranın mövqeyini dəstəklədiyini bəyan edib. Kreml rəsmilərinin verdiyi açıqlamada, İranın "özünümüdafiə hüququ"nun tanındığı qeyd olunub.
Münaqişənin regional miqyasda daha geniş bir savaşa çevrilmə riski qalmaqdadır. Beynəlxalq ictimaiyyət isə tərəfləri silahlı qarşıdurmanı dayandırmağa və diplomatik danışıqlara başlamağa çağırır.
Aybəniz Səfərova
20:10 19.06.2025
Oxunuş sayı: 8476
