Rutte: “ABŞ ordusunun Avropada qalacağına inanıram”
NATO-nun baş katibi Mark Rutte ABŞ-ın Avropadakı hərbi mövcudluğunu azaltmaq niyyətində olmadığını bildirib. O, Vaşinqtonun Avropada “çox güclü ənənəvi mövcudluğunu” saxlayacağına əmin olduğunu vurğulayıb.
Rutte Litvanın paytaxtı Vilnüsdə keçirilən sammitdə çıxışı zamanı bildirib: “Biz bilirik ki, ABŞ yalnız Avropa ilə deyil, həm də Yaxın Şərq və Hind-Sakit okean regionları ilə məşğuldur. Buna görə də imkanlarımızı artırdıqca ABŞ-ın Asiyaya daha çox diqqət yetirməsi məntiqlidir”.
Crossmedia.az xarici mediaya istinadən bildirir ki, Rutte həmçinin ABŞ-ın Avropada nüvə silahları ilə yanaşı, güclü şərti hərbi qüvvələrə sahib olacağını bildirib. O, bu açıqlamaları Buxarest Doqquzluğu (B9) və Skandinaviya ölkələrinin liderləri ilə birgə keçirilən toplantıda verib.
ABŞ-ın Ukrayna müharibəsi fonunda Avropadan qoşunlarını çıxara biləcəyi ilə bağlı iddialar səslənir. Fevral ayında ABŞ-ın müdafiə naziri Pete Hegseth Polşada bəyan etmişdi ki, Avropa ABŞ-ın hərbi mövcudluğuna daim arxayın olmamalıdır.
Xarici Əlaqələr Şurasının məlumatına görə, 2025-ci ilin əvvəlində Avropada təxminən 84 min ABŞ əsgəri yerləşdirilib. Rusiya-Ukrayna müharibəsindən sonra bu say 75 mindən 105 minə qədər dəyişib.
Litva prezidenti Gitanas Nauseda da ABŞ-ın Avropadan qoşun çıxaracağına dair heç bir siqnal almadıqlarını söyləyib. Onun sözlərinə görə, hazırda 1000 ABŞ əsgəri Baltikyanı ölkələrdə NATO qüvvələri ilə birlikdə xidmət edir.
Zəhra Ağayeva
13:42 03.06.2025
Oxunuş sayı: 10506
