Kamboca sərhəd mübahisəsinə görə Taylandı BMT məhkəməsinə verir
Kamboca hökuməti Taylandla uzunmüddətli sərhəd mübahisəsini Beynəlxalq Ədalət Məhkəməsinə (ICJ) çıxarmağa qərar verib. Bu qərar keçən həftə baş verən ölümcül hərbi toqquşmadan sonra verilib.
Milli Assambleya bazar ertəsi Baş nazir Hun Manetin rəhbərlik etdiyi hökumətin qərarını təsdiqləyib. Mübahisəli ərazilər arasında Ta Moan Thom, Ta Moan Toch və Ta Kro Bei kimi hindu üslublu tarixi məbədlər yerləşir.
Crossmedia.az xarici mediaya istinadən bildirir ki, 1962-ci ildə ICJ Preah Vihear məbədinin yerləşdiyi ərazini Kambocaya vermişdi. Həmin qərar Taylandda qəzəb doğurmuş və bu məsələ iki ölkə arasında uzun müddətdir ki, gərginlik yaradır. Məhkəmə 2013-cü ildə qərarını bir daha təsdiqləyib.
Taylandın xarici işlər naziri Maris Sangiampongsa Kambocanın məhkəməyə müraciət etmək hüququna malik olduğunu söyləsə də, bunun ikitərəfli danışıqlara təsir etməyəcəyini bildirib. Müdafiə naziri Phumtham Wechayachai isə iki ölkənin münaqişənin böyüməsinin qarşısını almaq üçün birgə çalışdığını vurğulayıb.
Mayın 28-də Preah Vihear əyalətində baş verən sərhəd insidentində bir Kamboca əsgəri həlak olub. Kamboca iddia edir ki, Tayland qüvvələri patrul aparan əsgərlərinə atəş açıb, Tayland isə əksinə, Kamboca əsgərlərinin mübahisəli əraziyə girərək atəş açdığını bildirir.
Hun Manet bildirib ki, Tayland prosesə qoşulmasa belə, Kamboca digər mübahisəli ərazilərin də statusunun aydınlaşdırılması üçün məhkəməyə müraciət edəcək. O əlavə edib ki, məqsəd gələcəkdə hərbi qarşıdurmaların qarşısını almaqdır.
Bu məsələ Taylandda millətçi dairələrdə xüsusi həssaslıq doğurur. 2008-ci ildə Preah Vihear məbədinin YUNESKO-nun Dünya İrsi Siyahısına salınmasından sonra tərəflər arasında bir neçə ölümcül toqquşma baş vermişdi.
Zəhra Ağayeva
13:36 03.06.2025
Oxunuş sayı: 955
