Baş nazirin ailəsinin dəbdəbəli həyatı Monqolustanda siyasi böhran yaratdı
Monqolustanın baş naziri Oyun-Erdene Luvsannamsrayın oğlunun sosial şəbəkələrdə dəbdəbəli həyat tərzini nümayiş etdirməsi ölkədə kütləvi etirazlara və istefa tələblərinə səbəb olub.
Crossmedia.az xəbər verir ki, “CNN International”ın məlumatına görə, etirazlar artıq iki həftədir paytaxt Ulanbatorun mərkəzində davam edir. Bu gün Baş nazir Luvsannamsrayın gələcək siyasi taleyini müəyyənləşdirəcək etimad səsverməsi keçirilməsi gözlənilir.
Etirazlara səbəb olan əsas məqam baş nazirin oğlunun sosial şəbəkədə paylaşdığı görüntülər olub. Paylaşımlarda helikopterlə səyahətlər, brend çantalar, bahalı avtomobil və qiymətli üzük kimi detallarla bəzədilmiş dəbdəbəli evlilik təklifi diqqət çəkib. Oyun-Erdene Luvsannamsray daha əvvəl seçki kampaniyasında varlı bir ailədən gəlmədiyini, kənd yerlərində böyüdüyünü vurğulamışdı. Buna görə də ictimaiyyət oğlunun bu qədər var-dövlətə necə sahib olduğunu sual etməyə başlayıb.
“Ogtsroh Amarha” (İstefa asandır) adlı etiraz hərəkatının 28 yaşlı üzvü Amina bildirib: “Açıq-aşkar heç bir gəlir mənbəyi olmayan bir ailənin lüks çantaları, özəl səyahətləri və zəngin həyat tərzini nümayiş etdirməsi, adi bir Monqolustan vətəndaşının üzünə vurulmuş sillə kimidir”.
Etirazçılar bu hadisənin təkcə sosial media paylaşımlarından ibarət olmadığını, eyni zamanda hakimiyyət elitası ilə sıravi vətəndaşlar arasında artan uçurumu göstərdiyini qeyd edirlər.
Monqolustandakı dərin narazılığın digər səbəbləri isə artan həyat xərcləri, yüksələn inflyasiya və paytaxt Ulanbatorda ölkə əhalisinin yarısının yaşadığı şəhərdə ciddi ekoloji problemlərin olmasıdır. Amina bu barədə belə deyib: “Monqolustanda həyat getdikcə bahalaşır. Çox insan gündəlik ərzaq, kirayə və digər əsas ehtiyaclarını güclə qarşılayır. Bir çoxu aylıq gəlirlərinin yarısını vergi kimi ödəyir. İnsanlar artıq maaşla yaşaya bilmir, kredit və borcla dolanırlar”.
Etirazçılar son iki həftə ərzində hər gün Sükhbaatar meydanında yerləşən hökumət binası qarşısında toplanaraq Baş nazirin gəlir və əmlak bəyannaməsini təqdim etməsini və istefasını tələb edirlər.
Baş Nazirlik Ofisi isə CNN-ə açıqlamasında yayılan iddiaları “tamamilə əsassız” adlandırıb və Oyun-Erdene Luvsannamsrayın Monqolustan qanunvericiliyinə uyğun olaraq hər il rəsmi gəlir və əmlak bəyannaməsini təqdim etdiyini bəyan edib.
Mədinə Cəlilova
03:00 03.06.2025
Oxunuş sayı: 8127
