Qəzzada atəşkəs dalanı: İsrail daimi atəşkəs istəmir
Qəzzada atəşkəs danışıqları növbəti dəfə nəticəsiz qalıb. HƏMAS daimi atəşkəs və İsrail əsgərlərinin bölgədən tamamilə çıxmasını tələb etdiyi halda, İsrail bu şərtlərə qarşı çıxır.
Crossmedia.az xarici KİV-ə istinadən xəbər verir ki, ABŞ Prezidenti Donald Trampın Yaxın Şərq üzrə xüsusi nümayəndəsi Steve Witkoff tərəfindən hazırlanmış plana HƏMAS dəyişikliklər edilməsini istəyib. HƏMAS-ın tələblərinə daimi atəşkəsin təmin olunması, İsrail qüvvələrinin Qəzzadan tam şəkildə çıxması, bölgəyə humanitar yardımın artırılması daxildir. Eyni zamanda Rəfah sərhəd keçidinin açılması, elektrik və su kimi infrastrukturun bərpası, xəstəxana, məktəb və çörək zavodlarının təmiri üçün inşaat materiallarının daxil olmasına icazə verilməsi də istənilib.
İsrail isə bu tələblərə qarşı çıxaraq, Qəzzada müharibənin daimi sona çatdırılması və qüvvələrinin bölgədən çıxarılmasını qəbul etmir. Witkoff, HƏMAS-ın bu tələblərini “qəbulolunmaz” adlandırıb. İsrail Baş naziri Benyamin Netanyahu isə Witkoff planını qəbul etdiklərini, HƏMAS-ın isə rədd etdiyini bildirib. Netanyahu bütün girovların geri qaytarılacağına söz verib.
HƏMAS isə Witkoff-u İsrail tərəfkeşliyi ilə ittiham edib. Danışıqların çıxmaza düşməsinə baxmayaraq, Misir və Qətər atəşkəs üçün səylərini artırmaq niyyətində olduqlarını açıqlayıb. HƏMAS da dolaylı danışıqlara dərhal yenidən başlamağa hazır olduqlarını bildirib.
Bu arada İsrail Silahlı Qüvvələrinin Baş Qərargah rəisi Eyal Zamir orduya Qəzzadakı əməliyyatları genişləndirmək göstərişi verib.
Mədinə Cəlilova
01:00 03.06.2025
Oxunuş sayı: 12387
