Qəzzada yardıma gedənlərə atəş açıldı: Ölənlər var
Qəzzada yeni humanitar yardım sisteminin bir hissəsi olan paylama mərkəzi ətrafında baş verən insident zamanı azı 25 nəfər həlak olub, 175 nəfər isə yaralanıb.
Qırmızı Xaç Sahə Xəstəxanası və hadisə şahidlərinin verdiyi məlumata görə, insanlar bazar günü Qəzza zolağında ərzaq yardımı almağa gedərkən yardım sahəsinə açılan atəş nəticəsində ölü və yaralılar qeydə alınıb.
Crossmedia.az xarici mediaya istinadən bildirir ki, şahidlərin dediyinə görə, İsrail əsgərləri yardım məntəqəsindən təxminən 1000 metr aralıda toplanmış izdihama atəş açıb. Yardım isə İsrailin dəstəklədiyi təşkilatlardan biri tərəfindən paylanırdı.
İsrail ordusu hadisə ilə bağlı açıqlama verərək bildirib ki, “humanitar yardımın paylanması bölgəsində açılan atəş nəticəsində yaralananlarla bağlı hazırda məlumat yoxdur”. Yardımı bölgəyə çatdıran, ABŞ və İsrailin dəstəklədiyi “Qəzzaya Humanitar Yardım Fondu” isə səhər saatlarında yardımın “insidentsiz” paylandığını və ətrafda xaos və atəş səsləri ilə bağlı xəbərlərin doğru olmadığını iddia edib.
Şahidlər isə fərqli danışır. Onların sözlərinə görə, əraziyə yaxın bir kəsişmədə atışma baş verib və İsrail əsgərləri yardım almağa gedən insanlara birbaşa atəş açıblar. 40 yaşlı İbrahim Əbu Səud hadisə zamanı çoxlu sayda, o cümlədən qadınların şəhid olduğunu, insanların hərbçilərdən təxminən 300 metr məsafədə olduğunu deyib.
33 yaşlı Məhəmməd Əbu Teaima isə yardım mərkəzinə doğru irəliləyərkən əmisi oğlunun və bir qadının vurulduğunu, əmisi oğlunun sinəsindən aldığı güllə yarası nəticəsində yerindəcə həyatını itirdiyini bildirib.
BMT-nin agentlikləri və bir sıra beynəlxalq yardım təşkilatları İsrailə yardım bölgələrində nəzarət imkanı verilməsinə etiraz edərək bu yeni sistemlə işləməkdən imtina ediblər. İsrail və ABŞ isə bu sistemin HƏMAS-ın yardımları ələ keçirməsinin qarşısını almağa yönəldiyini iddia edir.
Zəhra Ağayeva
10:28 02.06.2025
Oxunuş sayı: 8551
