Türkiyə Krım tatarları və çərkəzlərin deportasiyası qurbanlarını ehtiramla andı
Türkiyə Respublikası Xarici İşlər Nazirliyi Krım tatarları və çərkəzlərin deportasiyasının ildönümü münasibətilə rəsmi bəyanat yayıb. Bəyanatda qeyd olunur ki, bu faciələr xalqların kollektiv yaddaşında sağalmayan yaralar kimi yaşayır.
“81 il əvvəl Krım tatarları öz doğma torpaqlarından zorla köçürülmüş, qeyri-insani şəraitdə aparılan deportasiya nəticəsində minlərlə insan həyatını itirmişdir,” – deyə bəyanatda bildirilir.
Nazirlik vurğulayıb ki, uzun illər keçməsinə baxmayaraq Krım tatarlarının hüquqları hələ də tam şəkildə bərpa olunmayıb. Xüsusilə Krımın qanunsuz ilhaqı bu xalqın çəkdiyi iztirabları daha da dərinləşdirib.
Həmçinin bəyan edilib ki, Türkiyə bundan sonra da Krım tatarlarının öz yurdlarında təhlükəsizlik, rifah və mədəni kimliklərini qoruyaraq yaşamaq uğrundakı haqlı mübarizəsinə dəstəyini davam etdirəcək.
Bəyanatda çərkəzlərin kütləvi deportasiyasının 161-ci ildönümünə də toxunulub. Qeyd olunub ki, bu tarixi faciə zamanı Qafqaz xalqları öz torpaqlarından məcburi şəkildə sürgün olunmuş, çox sayda insan həyatını itirmişdir.
“Krım tatarlarının və qardaş Qafqaz xalqlarının dərdini bölüşür, bu ağrılı tarixi hadisələr zamanı həlak olan bütün soydaşlarımızı ehtiramla yad edirik. Bu faciələr bəşər tarixində silinməz izlər qoymuşdur,” – deyə Türkiyə Xarici İşlər Nazirliyi bəyan edib.
Nigar Yahyazadə
22:49 18.05.2025
Oxunuş sayı: 6842
