ABŞ rəsmisi: Tramp İran və ərəb ölkələrini birləşdirsə, Yaxın Şərq Avropa İttifaqını geridə qoya bilər
ABŞ-ın Yaxın Şərq üzrə nümayəndəsi Stiv Vitkoff bölgənin iqtisadi potensialı ilə bağlı diqqətçəkən açıqlamalar verib. Onun fikrincə, prezident Donald Tramp İranla ərəb ölkələri arasında əməkdaşlıq platforması yarada bilsə, Yaxın Şərq iqtisadi baxımdan Avropa İttifaqını (Aİ) geridə qoya bilər.
Crossmedia.az xarici mediaya istinadən bildirir ki, Vitkoff bu fikirləri çıxışı zamanı səsləndirib: “Əgər prezident Tramp İran və ərəb dövlətlərini bir araya gətirməyə nail olsa, Yaxın Şərq Avropa İttifaqından daha güclü iqtisadi məkana çevrilə bilər”. O, Körfəz ölkələrinin birləşərək Aİ-yə real alternativ ola biləcəyini də qeyd edib
ABŞ rəsmisi bölgənin zəngin enerji resursları, strateji coğrafi mövqeyi və gənc əhalisi sayəsində iqtisadi baxımdan böyük potensiala malik olduğunu vurğulayıb. Onun fikrincə, siyasi sabitlik və qarşılıqlı əməkdaşlıq bu potensialın reallaşmasında əsas rol oynaya bilər.
Stiv Vitkoffun bu açıqlamaları Vaşinqtonun Yaxın Şərqdə yeni iqtisadi və diplomatik yanaşmalar axtardığını göstərir. Ekspertlər isə bildirirlər ki, İran və ərəb ölkələri arasında münasibətlərin yaxşılaşdırılması həm regionun təhlükəsizliyi, həm də iqtisadi inkişafı üçün mühüm addım ola bilər.
Fatimə Nəbiyeva
16:50 17.05.2025
Oxunuş sayı: 8001
