Xarici xəbərlər
Makron: “Rusiya barış istəmədiyini göstərdi”
Fransa Prezidenti Emmanuel Makron Rusiyanın Ukrayna ilə münaqişədə atəşkəs çağırışlarına cavab vermədiyini bildirib. O, bunun Rusiyanın barış istəmədiyini göstərdiyini deyib və Moskvanın zaman qazanmağa çalışdığını vurğulayıb. Makron ABŞ Prezidenti Donald Trampla telefon danışığında da Putinin atəşkəsə ikinci dəfə reaksiya verməməsini “qəbulolunmaz” adlandırıb.
Crossmedia.az xarici mediaya istinadən bildirir ki, Albaniyanın paytaxtı Tiranada keçirilən Avropa Siyasi Topluluğunun 6-cı Zirvəsi çərçivəsində Makron, Ukrayna Prezidenti Volodimir Zelenski, İngiltərə Baş naziri Keir Starmer, Almaniya Kansleri Fridrix Mers və Polşa Baş naziri Donald Tusk ilə birgə görüş keçirib. ABŞ Prezidenti Trampla da telefon əlaqəsi yaradılıb. Görüşdə İstanbulda baş tutan sülh danışıqları və Rusiyanın münasibəti müzakirə edilib.
İngiltərə Baş naziri Keir Starmer Rusiyanın danışıqlara maraq göstərmədiyini bildirib və “Əgər Rusiya masaya oturmaq istəmirsə, Putin bunun əvəzini ödəməlidir” deyə bəyan edib. Zelenski isə Ukraynanın sülh üçün mümkün olan ən sürətli addımları atmağa hazır olduğunu bildirib və Rusiyaya qarşı sərt sanksiyaların davam etməsinin vacibliyini vurğulayıb.
Avropa Komissiyası Prezidenti Ursula fon der Leyen də Putinlə bağlı mövqeyini açıqlayaraq bildirib ki, Rusiya lideri sülh danışıqlarında iştirakdan imtina edib və bu, onun barış istəmədiyini sübut edir. O, Rusiyaya qarşı yeni sanksiya paketinin hazırlanmaqda olduğunu qeyd edib.
Yeni sanksiyalar Şimal Axını layihələrinə, Rusiya neftinin qiymətinə və kölgə donanmasına qarşı tədbirləri, eləcə də Rusiya maliyyə sektoruna əlavə məhdudiyyətləri əhatə edəcək. İndiyədək Avropa İttifaqı tərəfindən Rusiyaya qarşı 16 sanksiya paketi tətbiq olunub və bu çərçivədə 2000-dən çox şəxs və qurum cəzalandırılıb.
Fatimə Nəbiyeva
21:59 16.05.2025
Oxunuş sayı: 939
