3 Avropa ölkəsi ilə nüvə görüşmələri: İran rəsmiləri İstanbulda
İran rəsmiləri, Böyük Britaniya, Fransa və Almaniyadan yüksək səviyyəli diplomatlarla nüvə proqramı ilə bağlı danışıqlar aparmaq üçün Türkiyəyə gəlib.
İranı, İstanbulda keçiriləcək nüvə mövzulu görüşmədə xarici işlər nazir müavinləri Məcid Taxt Rəvançi və Kazım Qəribabadi təmsil edir. Görüş İranın İstanbuldakı Baş Konsulluğunda keçirilir və əsas müzakirə mövzusu Tehranın nüvə proqramıdır.
Crossmedia.az xarici KİV-ə istinadən xəbər verir ki, danışıqlarda Avropanın E3 adlandırılan Böyük Britaniya, Fransa və Almaniya nümayəndələri xarici işlər nazirlikləri səviyyəsində iştirak edir.
Əvvəllər 2 may tarixində İtaliyanın paytaxtı Romada keçirilməsi planlaşdırılan bu görüş, ABŞ-İran danışıqlarının təxirə salınmasından sonra ləğv edilmişdi.
İran tərəfi, 2015-ci ildə imzalanan nüvə sazişi çərçivəsində ləğv edilmiş BMT sanksiyalarının yenidən tətbiqinə imkan verən və “təhrikedici mexanizm” adlandırılan maddənin Avropa ölkələri tərəfindən işə salınacağından narahatdır. Həmin mexanizmin hüquqi qüvvəsi 18 oktyabrda başa çatır. Bu tarixə qədər nüvə proqramı ilə bağlı razılıq əldə olunmasa, Avropa ölkələrinin mexanizmi işə sala biləcəyi ehtimal edilir.
İran xarici işlər naziri Abbas Əraqçı 11 mayda Fransanın Le Point qəzetində dərc olunan məqaləsində, bu mexanizmin sui-istifadəsinin ciddi nəticələr doğura biləcəyini bildirib. Əraqçı qeyd edib:
“Bu, yalnız Avropanın sazişdəki rolunun sonu demək deyil, həm də geri dönüşü olmayan bir gərginliyin başlanğıcı ola bilər”.
Əraqçı eyni zamanda Avropa ölkələrini İranla yenidən nüvə mövzusunda danışıqlara çağırmışdı.
Mədinə Cəlilova
16:05 16.05.2025
Oxunuş sayı: 10065
