Hindistan su terroruna əl atır: Pakistan müqavilənin müdafiəsinə qalxıb
Hindistan və Pakistan arasında 1960-cı ildə imzalanmış Hind Suları Müqaviləsi Narendra Modi hökumətinin təcavüzkar və beynəlxalq hüquqa zidd addımları səbəbindən ciddi təhlükə altındadır. Bu müqavilə onillərlə bölgədə sülh və sabitliyi qoruyaraq su resurslarının ədalətli şəkildə bölüşdürülməsini təmin edib. İndi isə Hindistan bu müqaviləni siyasi alətə çevirərək Pakistana qarşı su ilə təzyiq vasitəsi kimi istifadə edir.
Crossmedia.az xarici mediaya istinadən bildirir ki, Hindistan ötən ay baş vermiş və mənşəyi tam araşdırılmamış hücumu bəhanə edərək, Pakistanın həyati əhəmiyyət verdiyi Hind çay sistemindən daha çox su götürəcəyini bəyan edib. Yeni Dehli birtərəfli şəkildə Hind Suları Müqaviləsindən çıxdığını açıqlayıb – bu isə beynəlxalq hüququn və dövlətlərarası müqavilələrin açıq şəkildə pozulmasıdır.
Baş nazir Narendra Modi su resurslarını silaha çevirərək Pakistanın kənd təsərrüfatına, içməli su ehtiyatlarına və sosial sabitliyinə zərbə vurmaq üçün səlahiyyətlilərə Çenab, Jelum və Hind çaylarında yeni layihələri sürətləndirməyi əmr edib. Xüsusilə Çenab çayında 19-cu əsrdən qalma Ranbir kanalının genişləndirilməsi ilə saniyədə 150 kubmetr suyun yönləndirilməsi planlaşdırılır. Bu, Pakistan üçün iqtisadi və ekoloji fəlakət anlamına gələ bilər.
Modi hökumətinin məsuliyyətsiz ritorikası da vəziyyəti daha da gərginləşdirir. Baş nazir “Su və qan birlikdə axa bilməz” deyərək açıq şəkildə su resurslarından siyasi və hərbi təzyiq aləti kimi istifadə etdiklərini etiraf edir. Hindistanın bu cür davranışı yalnız regional sabitliyi deyil, həm də beynəlxalq müqavilələrin etibarlılığını sual altına alır.
Pakistan isə Hindistanın bu təxribatçı mövqeyinə qarşı güclü diplomatik müqavimət göstərir. Xarici işlər naziri İshaq Dar Hindistanın birtərəfli və qanunsuz qərarlarını beynəlxalq ictimaiyyətə çatdıraraq, Hind Suları Müqaviləsinin hələ də qüvvədə olduğunu bəyan edib. O vurğulayıb ki, çayların axarının dəyişdirilməsi Pakistan üçün “müharibə elanı” kimi qiymətləndirilə bilər.
Ekspertlər qeyd edirlər ki, Hindistan bu addımı ilə bölgədə ekoloji fəlakət, ərzaq böhranı və humanitar problemlər yaradaraq Pakistanı strateji cəhətdən zəiflətməyə çalışır. Bu isə bir dövlətin təmiz suya çıxış hüququna qarşı aparılan açıq sabotajdır.
Hind Suları Müqaviləsinə əsasən, Hindistan yalnız Sutlej, Beas və Ravi çaylarından sərbəst istifadə edə bilər. Lakin Modi hökuməti bu balansı pozaraq beynəlxalq ictimaiyyəti də fakt qarşısında qoymağa çalışır. Bu da Hindistanın regionda sabitliyə deyil, hökmranlığa can atdığını sübut edir.
Zəhra Ağayeva
15:40 16.05.2025
Oxunuş sayı: 8509
