Simion Rumıniyada keçiriləcək prezident seçkiləri ərəfəsində diasporanın dəstəyinə ümid edir
Rumıniyada bu bazar günü keçiriləcək prezident seçkiləri öncəsində ifrat sağçı namizəd George Simion seçki kampaniyasını ölkə xaricində davam etdirir. O, xaricdə yaşayan rumınlardan səs almaq məqsədilə Avropa paytaxtlarında kampaniyalar aparır.
Son sorğular Simion ilə müstəqil namizəd Nicușor Dan arasında gərgin rəqabətin getdiyini göstərir. Rumıniya cəmiyyətində bu seçkilər ölkənin gələcək siyasi istiqamətini müəyyən edəcək mühüm hadisə kimi qiymətləndirilir.
Crossmedia.az xarici mediaya istinadən bildirir ki, Simion debatlarda iştirak etməkdənsə, altı milyona yaxın rumın vətəndaşının yaşadığı xarici şəhərlərdə dəstək axtarır. Bu addım onun daxildə kifayət qədər populyarlıq qazandığına inandığını göstərir.
Simion deyib: “İlk məqsədimiz xaricdə səs verəcək rumınlarla birbaşa təmas qurmaqdır. Diasporada səsvermə sabah başlayır, bu axşam isə Parisə gedirəm”. Avropa İttifaqı və NATO ilə münasibətlərə toxunan Simion əlavə edib: “Biz Avropa və NATO-ya qarşı deyilik. Xalq bu məsələdə yanlış məlumatlandırılıb. Mən Avropapərəst və NATO-ya yaxın bir prezident olaraq nümunə olacağam”.
Simion İtaliyanın baş naziri Giorgia Meloni ilə görüşüb, onun hökumətini “model” adlandıraraq belə deyib: “Onlar İtaliyada xaosa son qoydular və sabitlik gətirdilər. Bu, bizim üçün örnəkdir”. O həmçinin Polşanın keçmiş baş naziri Mateusz Morawiecki və prezident Anjey Dudaya heyranlığını ifadə edib.
Simion son olaraq bildirib ki, əgər həm o, həm də Polşadakı həmkarı Karol Nawrocki prezident seçilərsə, iki ölkə arasında güclü ittifaq qurulacaq.
Zəhra Ağayeva
15:50 16.05.2025
Oxunuş sayı: 9415
