Qazaxıstan yeni nəsil “Taimas 8x8” tipli zirehli texnikasını təqdim etdi
Qazaxıstan müdafiə sənayesində irəliləyiş əldə edərək yeni nəsil “Taimas 8x8” təkərli piyadaların döyüş maşınını (BMX) ictimaiyyətə təqdim edib. Bu zirehli texnika yüksək manevr qabiliyyətinə malik olmaqla yanaşı, döyüş şəraitində çoxfunksiyalı istifadə imkanı verir. Layihənin əsas məqsədi ölkənin hərbi potensialını artırmaq və milli istehsal imkanlarını genişləndirməkdir.
Crossmedia.az xarici mediaya istinadən bildirir ki, “Taimas 8x8” modeli Qazaxıstanın müdafiə sahəsində beynəlxalq əməkdaşlığının məhsuludur. Layihə Çin şirkəti Norinco və Türkiyənin tanınmış OTOKAR şirkəti ilə birgə hazırlanıb. Bu əməkdaşlıq çərçivəsində həm texniki təcrübə mübadiləsi aparılıb, həm də istehsalın müxtəlif mərhələlərində birgə fəaliyyət təşkil olunub. Mütəxəssislərin fikrincə, “Taimas 8x8” müasir döyüş texnologiyalarına cavab verir və həm müdafiə, həm də hücum əməliyyatlarında effektiv şəkildə istifadə oluna bilər.
Yeni zirehli maşın 30 mm-lik top, uzaqdan idarə olunan silah sistemi, minaya qarşı qoruyucu sistem və güclü zirehlə təchiz edilib. Bundan əlavə, o, müxtəlif relyeflərdə rahat hərəkət edə bilir və 8x8 təkər sistemi ilə yüksək sabitlik təmin edir. “Taimas” həm heyətin təhlükəsizliyini təmin edir, həm də döyüş bölgələrində effektiv müdafiə və hücum imkanları yaradır.
Bu layihə Qazaxıstanın hərbi-sənaye kompleksində beynəlxalq əməkdaşlığa açıq olduğunu göstərir. Yerli istehsal imkanlarının artırılması ilə yanaşı, xarici texnologiyaların ölkəyə transferi də mühüm əhəmiyyət daşıyır. Gələcəkdə bu kimi layihələrin artacağı və Qazaxıstanın müdafiə sahəsində daha müasir texnikalarla təchiz olunacağı gözlənilir.
Fatimə Nəbiyeva
18:00 15.05.2025
Oxunuş sayı: 13017
