Trampdan Putinin İstanbulda Ukrayna ilə görüş təklifi sonrası ilk açıqlama
Rusiya Prezidenti Vladimir Putinin Ukrayna müharibəsində üçüncü dəfə atəşkəs elan etməsi və 15 may tarixində Ukrayna ilə İstanbulda qeyri- şərtsiz birbaşa danışıqlar aparma təklifi sonrası ABŞ Prezidenti Donald Tramp bu mövzu ilə bağlı açıqlama verib.
Crossmedia. Prezident Trampın Truth Social-da paylaşdığı bəyanata istinadən xəbər verir ki, “Rusiya və Ukrayna üçün bəlkə də çox böyük bir gündür! Bu bitib-tükənməyən qan gölünün sona çatması ilə xilas ediləcək yüz minlərlə insanı düşünün” ifadələrini işlədib. “Bu, tamamilə yeni, daha yaxşı bir dünya olacaq” deyən Tramp, “Bunun gerçəkləşməsi üçün hər iki tərəflə işləməyə davam edəcəyəm. ABŞ artıq yenidənqurma və ticarətə fokuslanmaq istəyir. Böyük bir həftə yaxınlaşır” sözlərini əlavə edib.
Digər tərəfdən, Rusiyanın 9 May “Qələbə Günü” münasibətilə elan etdiyi müvəqqəti atəşkəs başa çatıb və Ukrayna Rusiyanın yenidən hücuma keçdiyini bildirib. Ukraynanın paytaxtı Kiyev şəhərinin meri Vitali Kliçko hava hücumundan müdafiə qüvvələrinin Rusiyanın Kiyevə endirdiyi hava zərbəsini dəf etməyə çalışdığını açıqlayıb. Hücumun Putin-in 15 mayda İstanbulda Ukrayna ilə birbaşa danışıqlar aparma təklifindən bir neçə saat sonra baş verdiyi qeyd olunub. Reuters agentliyinə danışan şahidlər də Kiyevdə hava hücumundan müdafiə sistemlərinin işə düşdüyünü göstərən partlayış səsləri eşitdiklərini bildiriblər.
Rusiya Prezidenti Vladimir Putin dünən Moskva şəhərində keçirdiyi mətbuat konfransında “Ukraynada üçüncü dəfə atəşkəs elan edirik” deyə bəyan edib və 15 may tarixində İstanbulda Ukrayna ilə qeyd-şərtsiz birbaşa danışıqların yenidən başlamasını təklif edib. Putin, Türkiyənin Rusiya-Ukrayna danışıqlarında oynadığı rola diqqət çəkərək, Prezident Rəcəb Tayyib Ərdoğanla görüşəcəyini bildirib. “Sabah cənab Prezident Ərdoğanla görüşümüz olacaq. Ondan Türkiyədə danışıqların keçirilməsi üçün şərait yaratmasını xahiş edəcəyəm. Onun Ukraynada sülh axtarışına töhfə vermək istəkliliyini bir daha təsdiqləyəcəyinə ümid edirəm. Ukrayna ilə ciddi danışıqlar aparmağa qərarlıyıq”, – deyə Putin vurğulayıb.
Mədinə Cəlilova
09:35 11.05.2025
Oxunuş sayı: 9977
