Avropa Rusiya aktivlərinin müsadirəsi ilə bağlı çətin seçim qarşısında
Avropa ölkələri Rusiya Mərkəzi Bankının dondurulmuş təxminən 300 milyard dollar həcmində aktivlərinin müsadirəsi ilə bağlı mürəkkəb qərar qarşısındadır.
Qərbin Vladimir Putinin üç il əvvəl Ukraynaya hərbi müdaxiləsindən sonra blokladığı bu vəsaitlərin böyük hissəsi Avropada, əsasən dövlət istiqrazları şəklində saxlanılır və Ukraynaya kreditlərin təminatı üçün istifadə olunur.
Lakin bu aktivlərin tam müsadirəsi beynəlxalq hüquqi risklər doğura və Avropa maliyyə sisteminə olan etibarı sarsıda bilər. Avropa Mərkəzi Bankının (ECB) prezidenti Kristin Laqard ötən həftə bunun potensial fəsadlarına toxunaraq bildirib:
“Beynəlxalq hüquqi əsaslar vacibdir, çünki bu, digər investorların Avropaya etimadına təsir göstərə bilər.”
ABŞ Prezidenti Donald Trampın Ukraynaya hərbi dəstəyi dayandırmaq və Rusiya ilə danışıqlara başlamaq niyyəti Avropanı alternativ maliyyə mənbələri axtarmağa vadar edib. Belçika, Almaniya və Fransa Rusiya aktivlərinin müsadirəsinə qarşı çıxmağa davam etsə də, son günlər bu məsələ yenidən gündəmə gəlib.
Virciniya Universitetinin hüquq eksperti Mitu Qulati bildirib ki, Trampın mövqeyi Avropa siyasətçilərini əvvəl düşünmədikləri addımları nəzərdən keçirməyə məcbur edir.
“Altı ay əvvəl buna qarşı çıxan eyni insanlar indi maraq göstərməyə başlayıblar.”
ECB rəsmiləri müsadirənin avronun qlobal etibarlılığına zərbə vuracağını qeyd etsələr də, bəzi siyasətçilər Ukraynaya dəstək üçün bu vəsaitləri istifadə etməyin qaçılmaz ola biləcəyini düşünürlər.
Avropa İttifaqı liderlərinin bu həftə məsələ ilə bağlı müzakirələri davam etdirəcəyi gözlənilir.
Mədinə Cəlilova
17:47 10.03.2025
Oxunuş sayı: 814
