“Azərbaycan nə istədiyini açıq şəkildə bildirir, Ermənistan isə tərəddüd içindədir”
Rusiya Cənubi Qafqazda uzunmüddətli sülhün təmin olunmasını dəstəkləyir və Azərbaycanla Ermənistan arasında davamlı münasibətlərin qurulmasının vacibliyini vurğulayır. Moskva hesab edir ki, tələsik hazırlanan sənədlər yeni qarşıdurmalara yol aça bilər. Rusiya xarici işlər nazirinin müavini Mixail Qaluzin “İzvestiya” qəzetinə müsahibəsində bildirib ki, Qərbin sürətləndirməyə çalışdığı sülh sazişi gələcəkdə regionda yeni problemlərə səbəb ola bilər. O qeyd edib ki, Moskva yalnız uzunmüddətli sabitliyə xidmət edəcək razılaşmanı dəstəkləyir.
Mövzu ilə bağlı Crossmedia.az-a danışan politoloq Tofiq Abbasov isə bildirib ki, Rusiya bölgədə sabitliyi qorumaq üçün neytral mövqe sərgiləməlidir: “Rusiya sabitliyi qorumaq üçün ilk növbədə Azərbaycan və Ermənistan arasında balanslı mövqe tutmalıdır. Burada hər hansı simpatiya və ya antipatiya olmamalıdır. Rusiya hər iki ölkəyə bərabər münasibət göstərməli və həqiqətən də onların arasında sülh və sabitliyin təmin olunmasını istədiyini sübut etməlidir”.
O əlavə edib ki, Moskva bölgədə təsir sahibi olan bir dövlətdir və heç bir güc mərkəzi öz sərhədləri yaxınlığında gərginlik istəməz: “Tarix göstərir ki, xüsusilə 1990-cı illərdə Rusiya Ermənistanı açıq şəkildə dəstəkləyib. Lakin zamanla Rusiya da anladı ki, bu siyasət mənfi nəticələr doğurur. Heydər Əliyevin hakimiyyətə gəlməsi ilə Moskva-Bakı münasibətlərində dönüş yarandı. İlham Əliyevin rəhbərliyi dövründə isə Azərbaycan-Rusiya münasibətləri tamamilə yeni səviyyəyə yüksəldi”.
Politoloq bildirib ki, Azərbaycan regionda sülh və sabitliyin tərəfdarıdır və heç bir ölkəyə qarşı aqressiv siyasət yürütmür: “Azərbaycan bütün dövlətlərlə normal münasibətlərin qurulmasını istəyir. Ermənistanın vəzifəsi isə regional sabitliyi pozmaqdır. Lakin bəzi xarici güclər, xüsusilə Fransa, Hindistan, Yunanıstan və Kipr, Ermənistanı silahlandıraraq onu yeni münaqişələrə sürükləməyə çalışırlar. Ancaq bu ölkələr anlamalıdırlar ki, Ermənistan nə qədər silahlandırılsa da, Azərbaycanın hərbi gücü ilə rəqabət apara bilməz”.
Tofiq Abbasov hesab edir ki, Rusiya üçün əsas məsələ 10 noyabr 2020-ci il üçtərəfli bəyanata uyğun olaraq Ermənistanın üzərinə götürdüyü öhdəlikləri yerinə yetirməsini təmin etməkdir. O vurğulayıb ki, Azərbaycan sülh prosesində şəffaf siyasət yürüdür: “Sülh müqaviləsinin gecikməsinin əsas səbəbi Ermənistanın qeyri-konstruktiv mövqeyidir. Münaqişələrdən sonra Ermənistan sülh prosesinə hazır deyilsə, bu, bölgədə yeni boşluqlar yaradır və dağıdıcı nəticələrə səbəb olur”.
Politoloq həmçinin bildirib ki, Azərbaycan 44 günlük müharibədən sonra Ermənistana sülh və əməkdaşlıq təklif edib: “Prezident İlham Əliyev inteqrasiya və birgə inkişaf imkanlarını vurğulayıb. Lakin Ermənistan müstəqil dövlət kimi xarici siyasət istiqamətini müəyyən edə bilmir, iqtisadi infrastrukturunu qurmaqda çətinlik çəkir və regional əməkdaşlıq imkanlarını dəyərləndirə bilmir”.
Abbasov vurğulayıb ki, Azərbaycan regionda lider dövlətdir və bu, həm uğurlu diplomatiya, həm də iqtisadi inkişaf sayəsində mümkün olub. Onun sözlərinə görə, Ermənistan isə yanlış siyasət nəticəsində özünü blokada vəziyyətində saxlayır: “Bölgədə davamlı sülh üçün əsas şərt Ermənistanın öhdəliklərindən boyun qaçırmamasıdır. Sülh təkcə Azərbaycan üçün deyil, bütün qonşu ölkələr, o cümlədən Rusiya, İran, Gürcüstan və Türkiyə üçün də vacibdir.”
Sonda politoloq qeyd edib ki, Ermənistan reallıqları düzgün dəyərləndirməli və regionun bir parçası kimi hərəkət etməlidir. Əks halda, qeyri-müəyyənlik və destruktiv siyasət nəticəsində ən çox itirən yenə də Ermənistan olacaq.
Maral Şahverdili
19:05 10.02.2025
Oxunuş sayı: 5042
