Bahtiyar Ersay Paşa – Qardaşlığın və Zəfərin Rəmzi
Türkiyə və Azərbaycan ordularının qardaşlığının canlı simvollarından biri olan korgeneral Bahtiyar Ersayın bu gün 55 yaşı tamam olur. O, təkcə hərbçi deyil, eyni zamanda tarixin gedişatına təsir göstərən bir komandan, Azərbaycan-Türkiyə hərbi əməkdaşlığında müstəsna rolu olan şəxslərdən biridir.
Bahtiyar Ersay 8 fevral 1969-cu ildə Türkiyənin Tunceli vilayətinin Çemişgezek rayonunda anadan olub. İşıqlar Hərbi Liseyini və Quru Qoşunları Məktəbini (Kara Harp Okulu) bitirib. Topçu və Raket Məktəbində ixtisas təhsilini tamamlayıb. Daha sonra Quru Qoşunları Akademiyasını və Silahlı Qüvvələr Akademiyasını bitirərək qərargah zabiti olub. 2009-cu ildə topçu qərargah polkovniki rütbəsinə yüksəlib və bu rütbədə olarkən Tunisdə hərbi attaşe vəzifəsini icra edib. Tunisdə baş verən Yasəmən İnqilabı zamanı Bahtiyar paşa 28 min Türkiyə vətəndaşının təhlükəsiz şəkildə təxliyə edilməsində mühüm rol oynayıb.
2019-cu ildə general-mayor (tümgeneral) rütbəsinə yüksəlib və Quru Qoşunlarının Əməliyyatlar İdarəsinin rəisi vəzifəsinə gətirilib. II Qarabağ müharibəsində strateji və taktiki planlamalarda iştirak edib. Müharibədən sonra da Azərbaycanda qalaraq 2021-ci ildə Baş Qərargahın sərəncamına göndərilib və Azərbaycan Missiya Qrupu Komandanlığına təyin edilib.
Bahtiyar Paşanın tarixi rolunu, 1918-ci ildə Osmanlı Dövlətinin Azərbaycanın xilası üçün göndərdiyi Qafqaz İslam Ordusunun komandanı Nuri Paşanın missiyasının davamı kimi dəyərləndirilə bilərik. Bir əsr öncə Osmanlı türkü Azərbaycan türkünə qardaş əlini uzatdığı kimi, bu gün də eyni ruh və vəfa ilə Türkiyə və Azərbaycanın orduları “bir millət, iki dövlət” şüarı altında çiyin-çiyinə dayanır.
2023-cü ildən etibarən Bahtiyar paşa Türkiyə Silahlı Qüvvələri Baş Qərargahında müşavirlik vəzifəsini icra edir. Onun dərin bilik və təcrübəsi, strateji düşüncəsi təkcə Azərbaycan və Türkiyə üçün deyil, ümumiyyətlə, Türk Dünyasının hərbi gücünün möhkəmlənməsi baxımından da mühüm əhəmiyyət daşıyır.
Dünya tarixində ən şərəfli peşələrdən biri Türk əsgəri olmaqdır. Bu müqəddəs və qutsal missiyanı haqq edərək şərəflə daşıyan Bahtiyar Paşaya bundan sonra da çıxdığı hər savaşda, rəhbərlik etdiyi hər bir orduda böyük zəfərlər arzulayırıq!
Ayhan Ağarzayev
15:33 08.02.2025
Oxunuş sayı: 6555
