"SOCAR Turkiye Enerji" ekoloji təmiz aviasiya yanacağının istehsalı imkanlarını araşdırır
"SOCAR Turkiye Enerji" STAR neft emalı zavodunda (NEZ) ekoloji təmiz aviasiya yanacağının (SAF) istehsalı imkanlarını araşdırır.
Crossmedia.az bu barədə “SOCAR Turkiye”nin neft emalı və neft-kimya bölməsinin rəhbəri Kənan Mirzəyevə istinadən xəbər verir.
"Biz neft emalı sahəsində bioyanacağa tələbatın artmasını gözləyirik və bununla əlaqədar hazırda bir layihə üzərində işləyirik. Bu, “Sustainable Aviation Fuel” (SAF) ekoloji təmiz aviasiya yanacağının istehsalı layihəsidir. Hazırda layihə texniki qiymətləndirmə mərhələsindədir və inanırıq ki, SAF istehsalı NEZ-də ən böyük transformasiya olacaq. Biz artıq bu layihə üzərində işə başlamışıq", - K.Mirzəyev bildirib.
Bundan əlavə, o qeyd edib ki, neft-kimya sektorunda şirkət ümumilikdə kimya və neft-kimya məhsullarına tələbatın artacağını gözləyir.
"Hesab edirik ki, neft-kimya və kimya sənayesi neftə daha çox tələbat yaradacaq. Buna görə də SOCAR olaraq strategiyamız bu sektorlarda inkişaf etməkdir", - o vurğulayıb.
SAF Jet-A1 yanacağının ekoloji təmiz versiyası olan dayanıqlı aviasiya yanacağıdır. Adi aviasiya yanacağından fərqli olaraq, SAF təmiz halda karbon emissiyalarını 80 % azaldır.
ABŞ 2050-ci ilədək SAF-dan 50 % istifadəyə keçməyi planlaşdırır. Avropa İttifaqı 2025-ci ildən etibarən SAF-dan 2 % səviyyəsində istifadəni tətbiq edəcək və bu göstəricini 2030-cu ildən 5 %-ə, 2050-ci ilə qədər isə 63 %-ə çatdıracaq.
16:40 07.02.2025
Oxunuş sayı: 12615
