Təhsildə yenilik: ənənəvi jurnalları elektron jurnallar əvəzləyəcək – BUNLARI BİLMƏK VACİBDİR
Bu gün Elm və təhsil naziri Emin Əmrullayevin media üçün brifinqdə çıxışında növbəti tədris ilindən etibarən kağız jurnalların ləğv ediləcəyini və elektron jurnalların tətbiq olunacağını açıqlayıb. "Rəqəmsal məktəb" platforması sayəsində valideynlər övladlarının dərs prosesini onlayn şəkildə izləyə biləcək. Bəs elektron jurnalların yaradılmasının nə kimi üstünlükləri olacaq?
Bu barədə Crossmedia.az-a danışan təhsil eksperti Əmrah Həsənli bu addımın çox vacib və müsbət bir addım olduğunu vurğulayıb: "Kağız jurnalların ləğv edilməsi və elektron jurnalların tətbiqi, təhsil sistemində modernləşmə prosesinin bir hissəsidir. Elektron jurnallar həm müəllimlərə, həm də şagirdlərə və valideynlərə bir sıra üstünlüklər təqdim edir. Bu dəyişikliklər yalnız texnologiyanın təhsilə inteqrasiyasını gücləndirmir, həm də təhsil prosesini daha şəffaf və səmərəli edir".
Bəs elektron jurnalların nə kimi üstünlüyü var?
Əmrah Həsənli elektron jurnalların məlumatların daxil edilməsi, izlənməsi və yenilənməsi prosesini asanlaşdırdığını, müəllimləin dərhal qiymətləri və şərhləri əlavə edə biləcəklərini vurğulayıb: “Valideynlər və şagirdlər dərhal qiymətləri və digər məlumatları onlayn olaraq izləyə bilərlər. Bu, təhsilin şəffaflığını artırır və valideynlərlə məktəb arasında daha yaxın əlaqə yaradır. Elektron jurnallar məlumatların qorunması, saxlanması və idarə olunmasını asanlaşdırır. Elektron jurnalların tətbiqi kağız istehsalını azaldır, bu da ətraf mühitə müsbət təsir göstərir.
Belə ki, texnologiya təhsil prosesinə inteqrasiya olunduqca, müəllimlər dərs materiallarını onlayn platformalarda paylaşa bilərlər, şagirdlərə interaktiv və rəqəmsal alətlər vasitəsilə öyrənmək imkanı yaradılar. Bu həmçinin, uzaqdan təhsil və rəqəmsal qiymətləndirmə kimi yeni metodların tətbiqinə imkan verəcək".
Ekspertin fikrincə, elektron jurnalların istifadəyə verilməsi üçün məktəblərin infrastrukturunun təkmilləşdirilməsi vacibdir. Belə ki, internetin sürəti, komputer və digər texnoloji avadanlıqların mövcudluğu bu keçidi dəstəkləmək üçün əsas şərtlərdir. Eyni zamanda, müəllimlərin bu yeni sistemə adaptasiya olmaları, elektron jurnallarla işləmə bacarıqlarını inkişaf etdirmələri vacibdir. Lakin bütün bu çətinliklər zamanla aradan qaldırıla bilər: "Ümumiyyətlə, texnoloji yeniliklər gənc nəsil tərəfindən daha asan qəbul edilir, çünki onlar rəqəmsal alətlərlə böyüyüblər. Lakin, bəzi valideynlər kağız jurnalların təhlil edilməsinə daha çox öyrəşiblər. Buna görə də, məktəblər bu keçidi tədricən həyata keçirməli, valideynlərə bu yeni sistem haqqında məlumat verərək, onları maarifləndirməlidirlər. Şagirdlər isə bu yeniliyi ümumiyyətlə müsbət qarşılayacaq, çünki onların əksəriyyəti rəqəmsal alətlərdən gündəlik həyatlarında istifadə edirlər".
Elektron-jurnalların tətbiqi hansı güzəştlərə səbəb olacaq?
"Uzunmüddətli perspektivdə, elektron jurnalların tətbiqi təhsil sistemini daha çevik, dinamik və şəffaf edəcək. Müəllimlər və məktəb administrasiyası daha səmərəli şəkildə məlumat toplayacaq və qiymətləndirmələri aparacaqlar. Bu, həmçinin təhsil siyasətində daha yaxşı qərarların qəbul edilməsinə şərait yaradacaq. Nəticədə, Azərbaycan təhsilinin daha müasir və beynəlxalq standartlara uyğun inkişafı təmin ediləcək",- Əmrah Həsənli əlavə edib.
Fatimə Məmmədova
17:24 06.02.2025
Oxunuş sayı: 13029
