Keçmiş deputat: “Büdcədə göstərilən rəqəm “Quran” ayəsi deyil...”
Dünya bazarında “Azeri Light” markalı Azərbaycan neftinin 1 barelinin qiyməti 0,71ABŞ dolları, yaxud 0,83 % azalaraq 84,07ABŞ dolları təşkil edib. Azərbaycanın builki dövlət büdcəsində bir barel neftin orta qiyməti 70 ABŞ dollarından hesablanıb.
Neftin qiymətinin gələcəkdə də ucuzlaşma perspektivi barədə Crossmedia.az-a danışan iqtisad elmləri doktoru, professor, Azərbaycan parlamenti IV çağırış millət vəkili Rüfət Quliyev bildirib ki, son günlərdə neftin bir bareli 80 dolları keçib: “Azərbaycan nefti (Azeri Light) Brent markalı neft ilə müqayisədə təxminən 2 dollar 70 sentə qədər daha baha satılır. Buna görə də sözügedən məsələdə heç bir narahatlıq və ya ziddiyət görmürəm”.
İqtisadçının fikrinə görə, digər baxımdan ABŞ-nin yeni seçilmiş prezidenti, Respublikaçıların lideri Donald Tramp hakimiyyətə gələndə neftin qiymətini azaldacağı ilə bağlı yayılan söz-söhbətlər də inandırıcı deyil: “Hadisələr onu göstərir ki, bu qiymət hətta daha da arta bilər. Buna baxmayaraq, gözləmək lazımdır. Eyni zamanda büdcədə göstərilən rəqəm Quran ayəsi deyil ki, dəyişməz olsun. Bu, hökumətin müraciətidir və Milli Məclisdə müzakirə olunaraq ya azaldıla, ya da artırıla bilər”.
Fidan Hacızadə
10:42 17.01.2025
Oxunuş sayı: 8730
