Sosial şəbəkələrdə xarici ölkələrin müəyyən etdiyi qaydalar çərçivəsində hərəkət etməliyik
Azərbaycan qədim tarixi, zəngin mədəniyyəti və milli-mənəvi dəyərləri ilə dünyada seçilən bir ölkədir. Əsrlər boyu formalaşan adət-ənənələrimiz millətimizin keçmişi, bu günü və gələcəyi arasında möhkəm mənəvi körpü rolunu oynayır. Bu dəyərlər təkcə xalqımızın həyat tərzində deyil, həm də dövlətçiliyimizin möhkəmləndirilməsində mühüm rol oynayır.
Son dövrlərdə sosial şəbəkələrdə yayılan bəzi xoşagəlməz hallarla bağlı ekspertlər milli-mənəvi dəyərlərin qorunması istiqamətində maarifləndirmə işlərinin gücləndirilməsini, xüsusilə də gənclər arasında vətənpərvərlik və vətəndaşlıq hisslərinin inkişaf etdirilməsini vacib hesab edirlər.
Media məsələləri üzrə ekspert Azər Həsrət Crossmedia.az-a açıqlamasında bildirib ki, milli-mənəvi dəyərlərin qorunması hər bir vətəndaşın üzərinə düşən məsuliyyətdir:
“Milli və mənəvi dəyərlərin sosial şəbəkələrdə qorunması yalnız bir nəfərin və ya dövlətin işi deyil. Sosial şəbəkələr tamamilə açıq bir mühitdir və bizim geniş istifadə etdiyimiz bu platformaların birbaşa Azərbaycan dövlətinə bağlılığı yoxdur. Onlar xarici ölkələrdə qurulur, mərkəzləri də orada yerləşir. Biz həmin ölkələrin müəyyən etdiyi qaydalar çərçivəsində hərəkət etməyə məcburuq. Əks halda, hesablarımız bloklana bilər və ya istifadə hüququmuz məhdudlaşdırıla bilər. Buna görə də burada hər bir şəxsin görəcəyi işlər var. Biz o müqəddəs yeri boş buraxa bilmərik”.
Ekspert əlavə edib ki, sosial şəbəkələrdə pis niyyətli insanların geniş meydan qazanmasının qarşısını almaq üçün həmin mühiti daha yaxşı məzmunla doldurmaq lazımdır:
“Milli-mənəvi dəyərlərdən danışırıqsa, ağlı, savadı, ədəbi və əxlaqı yerində olan insanlar sosial şəbəkələrdə fəal olmalı və bu dəyərlərin təbliğinə töhfə verməlidirlər. Bəzən görürük ki, insanlar sosial şəbəkələrdən uzaq durur və ya hesab açsalar belə, aktivlik göstərmirlər. Belə yanaşma düzgün deyil. Əgər milli-mənəvi dəyərlərə bağlı insanlar susur və kənarda qalırsa, pis niyyətli insanlar öz məqsədlərinə nail olurlar”.
Azər Həsrət sosial şəbəkələrdə yayılan zərərli məzmunlara qarşı hüquqi müstəvidə də mübarizə aparılmasının vacibliyini vurğulayıb:
“Azərbaycan qanunvericiliyində böhtan, şər, qarayaxma və digər mənfi hallara qarşı mübarizə üçün kifayət qədər maddələr var. Pul cəriməsindən tutmuş, həbs cəzasına qədər tədbirlər nəzərdə tutulub. Lakin beynəlxalq insan haqları təşkilatlarının təzyiqləri səbəbindən dövlətimiz bəzən bu tədbirləri tətbiq etmir. Əslində, özünü ifadə azadlığı ilə başqalarına şər atmaq və böhtan söyləmək tamamilə fərqli şeylərdir. Buna görə də xalqın əxlaqını pozan insanlara qarşı daha sərt tədbirlər görülməli və insanlar öz məsuliyyətlərini dərk etməlidirlər”.
Ekspert yekunda qeyd edib ki, milli-mənəvi dəyərlərin qorunması yalnız hüquq müstəvisində deyil, hər bir vətəndaşın məsuliyyətli yanaşması ilə təmin edilə bilər:
“Hər kəs əlini daşın altına qoymalıdır. İnsanlar düşünməməlidir ki, sosial şəbəkələrdəki problemlərdən kənar qala bilər. Bu mübarizə bütün cəmiyyətin səfərbərliyi ilə mümkün olacaq”.
Maral Şahverdili
11:14 11.01.2025
Oxunuş sayı: 3439
