İmtahan tələbələrə öyrəndikləri bilikləri praktiki şəkildə nümayiş etdirməyə imkan verməlidir
Elm və Ali Təhsil Üzrə Dövlət Agentliyinin məlumatına görə, ali və orta ixtisas təhsil müəssisələrində imtahan sessiyası başlayıb. Təhsil naziri Emin Əmrullayevin 11 dekabr 2024-cü il tarixli əmrinə əsasən təşkil edilən sessiya ilk dəfə olaraq Azərbaycanın bütün ərazisində keçirilir və 100-dən artıq təhsil müəssisəsini əhatə edir. Bu addım təhsil prosesinin keyfiyyətini yüksəltmək və ölkə üzrə vahid standartları təmin etmək məqsədini güdür.
Azərbaycan Gənc Alim, Doktorant və Magistrlər Cəmiyyətinin sədri İlqar Orucov Crossmedia.az-a verdiyi açıqlamada, bu təşəbbüsün əhəmiyyətini vurğulayaraq bildirib: “Elm və təhsil naziri Cənab Emin Əmrullayevin 11 dekabr 2024-cü il tarixli əmrinin icrası olaraq, ölkəmizdə bütün ali və orta ixtisas təhsil müəssisələrində imtahan sessiyasına start verilib. Bu proses, hər il əhatə olunan tədris məzmununun qiymətləndirilməsinə hədəflənib və şəffaflıqla tətbiq ediləcək”.
İ.Orucov qeyd edib ki, Bu sessiya paytaxt təhsil müəssisələri ilə yanaşı, bölgələrdə fəaliyyət göstərən ali və orta ixtisas təhsili müəssisələrini də əhatə edir: “Hazırlıq prosesinin şəffaf və effektiv təşkili, təhsil müəssisələrinin bilavasitə öhdəliyidir. Bu istiqamətdə paytaxtda və bölgələrdə ciddi tədbirlər həyata keçirilir”.
Sədr qeyd edib ki, hər il fənlərə dair məzmunun qiymətləndirilməsi, imtahan suallarının əhatə dairəsinin genişləndirilməsi, şəffaf və obyektiv standartların tətbiqi prioritetdir: “Bununla yanaşı, şəffaflıq prinsiplərinin tam təmin olunması diqqət mərkəzindədir. Tələbələrə elə bir imtahan şəraiti yaradılmalıdır ki, onlar öyrəndikləri bilik və bacarıqları praktik şəkildə nümayiş etdirmək imkanı tapsınlar. Artıq bu istiqamətdə, bütün aidiyyəti qurumlar yeni standartları tətbiq edir. Beynəlxalq təcrübənin daxil edilməsi əsas prioritet kimi dəyərləndirilir. Təhsilin keyfiyyətini yüksəltməyə hədəflənmiş bu addımlar əsasən ali və orta ixtisas təhsili sferalarının modernləşdirilməsinə yardımcı olacaq”.
Nihat Tahirov
07:44 09.01.2025
Oxunuş sayı: 3911
