Təhsildə ənənəvi, yoxsa yeni metodlar?
"Ev tapşırıqlarının olması istənilən halda olmalıdır, amma ənənəvi qaydada deyil. Yəni şagirdlərə heç də hər gün və hər fənndən ev tapşırığı vermək düzgün deyil".
Bu fikirləri Crossmedia.az-a açıqlamasında təhsil eksperti Cahid İmanlı deyib. O, təhsildə "ənənəvi" metodlardan əlavə, müxtəlif üsullarda tətbiq oluna biləcək ev tapşırıqlarını nümunə göstərib:
"Müəllim şagirdlərin müstəqil öyrənmə bacarıqlarını yoxlamaq, internet resurslarından istifadə bacarığı yaratmaq, təbiəti və cisimləri müşahidə etmək qabiliyyəti formalaşdırmaq, təqdimat və prezentasiya hazırlamaq və təqdim etmək vərdişləri yaratmaq üçün müəyyən vaxt ərzində ev tapşırığı verə bilər. Daha yaxşı olardı ki, şagirdlərə ev tapşırığı növbəli şəkildə verilsin. Çünkü verilən ev tapşırığının yoxlanılması da vaxt aparır".
Təhsil eksperti gündəlik olaraq tətbiq edilən ev tapşırıqlarının, mənfi cəhətlərini də qeyd edib:
"Hər gün standart olaraq mövzuya aid əlavə ev tapşırığının verilməsi artıq köhnəlmiş metod sayılır. Şagirdə çoxlu ev tapşırığı və ya testlərin tapşırılması bir çox hallarda onların dərslərdən bezməsinə, köçürmə hallarının yaranmasına gətirib çıxarır".
Cahid İmanlı fikirlərini bu şəkildə tamamlayıb:
"Bir sözlə, ev tapşırığı nəzəri tapşırıqlardan daha çox şagirdin praktiki bacarıqlarının üzə çıxmasına yönəldilməlidir".
Aysel Ağakərimova
09:20 04.01.2025
Oxunuş sayı: 13571
