Qorxunc yuxu gerçəyə çevrildi: Yarasa qadının ağzına girdi
ABŞ-nin Virciniya ştatında yatmış qadının ağzına yarasa girib.
Crossmedia.az xəbər verir ki, “Unexplained Mysteries” bu barədə məlumat yayıb.
Hadisə avqustun sonunda baş verib. Qastroenteroloq Krista Edelman əri ilə birlikdə yatarkən qəribə yuxu görüb. Yuxusunda bir siçanın onun ağzına girməyə çalışdığını görən qadın oyanarkən əlini ağzına aparıb və heyvanı tutub. Lakin heyvanın siçan deyil, yarasa olduğu məlum olub.
Edelman əvvəlcə ciddi qorxu yaşasa da, qısa müddət sonra əri ilə birlikdə yarasanı tutaraq baytarlara təhvil verib. Heyvan quduzluq xəstəliyinin olub-olmaması ilə bağlı yoxlanılıb.
Nəticələri gözləyən Edelman ehtiyat tədbiri olaraq quduzluğa qarşı profilaktik peyvənd olunub. Sonradan yarasanın sağlam olduğu müəyyənləşib.
Buna baxmayaraq, qadının yaşadığı hadisənin yaratdığı qorxudan hələ tam qurtulmadığı bildirilib.
10:11 14.09.2026
Oxunuş sayı: 52
