Moskvada mənzillərin qiymətləri açıqlandı
Moskvada birotaqlı mənzilin ədalətli qiyməti 13-14 milyon rubl civarında olmalıdır.
Crossmedia.az xəbər verir ki, “Qazeta.Ru” bu barədə məlumat yayıb.
Fond bazarı üzrə ekspert Kirill Seleznyovun sözlərinə görə, hazırda paytaxtda birotaqlı mənzillərin orta qiyməti təxminən 16 milyon rubl təşkil edir.
Ekspert daşınmaz əmlakın qiymətini onun alınması üçün tələb olunan orta illik maaşların sayı ilə müqayisə etməyi təklif edib. Onun hesablamasına görə, böyük şəhərlərdə təxminən 60 kvadratmetrlik mənzilin qiyməti 10 illik orta gəliri keçməməlidir.
Seleznyov bildirib ki, Moskvada vergilər ödənildikdən sonra orta illik maaş təxminən 2 milyon rubl təşkil edir. Bu göstəriciyə əsasən, 60 kvadratmetrlik mənzilin qiyməti 20 milyon rubldan çox olmamalıdır.
Hazırda paytaxtda yeni tikililərdə ikiotaqlı mənzillərin orta qiyməti 22 milyon rublu keçir. Təxminən 80 kvadratmetrlik üçotaqlı mənzilin ədalətli qiyməti isə 26 milyon rubl ətrafında hesablanır. Hazırda belə mənzillərin qiyməti təxminən 30 milyon rubldur.
Ekspertin proqnozuna görə, mənzil qiymətləri 2028-2029-cu illərdə alıcıların gəlirlərinə uyğun səviyyəyə yaxınlaşa bilər. Bu, ya daşınmaz əmlakın ucuzlaşması, ya da mövcud qiymətlər qorunduğu halda inflyasiyanın mənzillərin real dəyərini azaltması hesabına baş verə bilər.
Qeyd edək ki, daha əvvəl ekspertlər 2026-cı ilin sonuna qədər Rusiyada mənzil qiymətlərinin artmaqda davam edəcəyini proqnozlaşdırıblar.
09:38 14.09.2026
Oxunuş sayı: 212
