Yəmənin qərbində husilərə hava zərbələri endirilib
Yəmən ordusu ölkənin qərb sahillərində, o cümlədən Moha şəhəri ətrafında husilərin mövqelərinə qarşı hava zərbələrinə başlayıb.
Crossmedia.az “Aljoumhouriya” telekanalına istinadən xəbər verir ki,zərbələr Moha, Xalid düşərgəsi və Cəbəl əl-Nar bölgələrində husilərin mövqelərinə endirilib.
Yəmən ordusunun sözçüsü Macid ən-Nuzeyli mülki şəxsləri Taiz-Moha və Moha-Dhubab yollarından istifadə etməməyə çağırıb. O, həmin ərazilərin növbəti bildirişə qədər qadağan olunmuş hərbi zona olduğunu bildirib.
Telekanalın məlumatına görə, zərbələrdən biri Mohada su və kanalizasiya layihəsinin ərazisində toplaşan çoxsaylı husilərə qarşı həyata keçirilib. Əl-Halidəki Souq əl-Xərc bölgəsinin də hava hücumlarına məruz qaldığı bildirilib.
Bundan başqa, Dhubab əl-Məndəb sahil rayonunda husilərin hərbi texnikasına ağır zərbələr endirilib.
Yəməndə hökumət qüvvələri ilə husilər arasında döyüşlərin iyulun əvvəlində yenidən başlamasından sonra cəbhə xəttində vəziyyət gərginləşib. Husilər Əl-Hudeydə vilayətinin tam nəzarətlərində olduğunu, həmçinin qərbi Taizdə irəliləyərək Mohanı və Qırmızı dənizdəki limanını ələ keçirdiklərini bildirirlər.
Yəməndə 2022-ci ilin aprelindən etibarən, təxminən 12 illik müharibədən sonra nisbi sakitlik hökm sürürdü. Lakin Qəzza müharibəsinin başlamasından sonra husilərin İsrail və Qırmızı dənizdə kommersiya gəmilərinə hücumları regiondakı gərginliyi artırıb. Yenidən başlayan döyüşlər isə ölkədə genişmiqyaslı müharibənin bərpa olunacağı ilə bağlı narahatlıqları gücləndirib.
23:23 11.09.2026
Oxunuş sayı: 49
