Rusiya Ukraynanın enerji obyektlərinə kütləvi zərbələr hazırlayır
Rusiya Ukraynanın enerji infrastrukturuna genişmiqyaslı zərbələr endirməyə hazırlaşır.
Crossmedia.az xarici KİV-ə istinadən xəbər verir.
Rusiya Müdafiə Nazirliyi bildirib ki, ölkənin hərbi qüvvələri Ukraynanın enerji obyektlərinə qarşı “kütləvi zərbələr” endirməyə hazırlıq görür. Nazirlik bu addımın Kiyevin Rusiyanın enerji infrastrukturuna yönəlmiş hücumlarına cavab olduğunu açıqlayıb.
Nazirliyin bazar günü “Telegram”da yayımladığı məlumatda qeyd olunub ki, Rusiya qüvvələri Ukraynanın enerji obyektlərinə genişmiqyaslı hücumların hazırlanmasına başlayıb.
Bu açıqlama Ukraynaya qarşı dron hücumlarının intensivləşdiyi bir vaxtda verilib. Bundan bir neçə gün əvvəl Rusiya Kiyev yaxınlığında yerləşən anbara dağıdıcı zərbə endirib.
Ukraynanın Energetika naziri Denis Şmıqal isə bu ayın əvvəlində açıqlamasında Rusiya Prezidenti Vladimir Putinin Ukraynanın enerji sistemini tamamilə sıradan çıxarmağa çalışdığını bildirib.
Nazirin sözlərinə görə, Kiyev ötən qış yaşanan və genişmiqyaslı elektrik kəsintilərinə səbəb olan böhranın təkrarlanmaması üçün enerji və infrastrukturun dayanıqlılığının gücləndirilməsi istiqamətində tədbirlər görəcək.
16:58 30.08.2026
Oxunuş sayı: 59
