Tətbiqi olmayan elm sahələri bizə lazım deyil
Universitetlərdə semestrin sonunda tələbələr öz ixtisaslarına uyğun olaraq müxtəlif müəssisələrdə təcrübələrə başlayırlar. Bununla belə, tələbələr bəzi universitetlərdə bəzi ixtisasların bu prosesdən kənarda qaldığını deyir. Bəs ümumiyyətlə hər hansı ixtisaslar praktikadan kənarda qalırmı?
Mövzu ilə bağlı təhsil eksperti Rəşad Qardaşovun Crossmedia.az-a verdiyi açıqlamasında bildirib ki, birmənalı olaraq bunu anlamaq lazımdır ki, təcrübənin 3 forması mövcuddur. Elmi, pedaqoji və istehsalat təcrübələri:
"Elmi təcrübələr elmi tədqiqatlara yönəlmiş fəaliyyətləri, pedaqoji təcrübələr təhsil sahəsindəki praktiki işləri, istehsalat təcrübələri isə istehsalat sahələrində tətbiqi işləri əhatə edir.
Qeyd edim ki, təhsil standartları Nazirlər Kabineti tərəfindən təsdiqlənir və bütün ixtisaslarda təcrübənin olması Bolonya təhsil modelinin tələbidir. Tələbələr ixtisaslarından asılı olaraq ya təhsil müddətində, ya da təhsilin son mərhələsində təcrübə keçməli olurlar".
Ekspertin sözlərinə görə, təcrübə yalnız müəllimlərin tələbələri bir yerə aparması ilə məhdudlaşmır:
"Hər sahənin özünəməxsus praktik formaları və yaxud da təcrübə əhəmiyyətini və keyfiyyətini özünde birləşdirən müəyyən sayda dərs yükü mövcuddur.
Qasaca desək, elə ixtisas yoxdur ki, onun təcrübəsi olmasın. Tətbiqi olmayan elm sahələri isə bizə lazım deyil. Təhsil və təcrübənin birgə həyata keçirilməsi dövrün və zamanın vacib tələbi sayılır".
Elnurə Kərimova
08:38 28.12.2024
Oxunuş sayı: 26058
