Lavrovdan şok açıqlama: Biz razılaşdıq, problem başqa tərəfdədir
İyulun 23-də Filippinin paytaxtı Manilada Rusiyanın xarici işlər naziri Sergey Lavrov və ABŞ dövlət katibi Marko Rubio arasında görüş keçirilib.
Crossmedia.az bu barədə xarici mediaya istinadən xəbər verir.
Bu, Donald Tramp administrasiyasının fəaliyyətə başlamasından sonra iki diplomatın 5-ci görüşü, telefon danışıqları da nəzərə alınarsa, onların 16-cı təması olub. Rusiya Xarici İşlər Nazirliyinin məlumatına görə, görüşün təşəbbüskarı ABŞ olub.
Görüşdən əvvəl Lavrov bildirib ki, Moskva Vaşinqtonun daha əvvəl irəli sürdüyü təkliflərdən imtina etmədiyini düşünür. O, ABŞ Prezidenti Donald Trampın Ukrayna münaqişəsinin həlli ilə bağlı əvvəlki açıqlamalarına diqqət çəkib və uzunmüddətli sülh razılaşmasının vacibliyini vurğulayıb.
Lavrov həmçinin ABŞ-ni Ukraynaya silah tədarükü və kəşfiyyat məlumatları ilə bağlı ittiham edib. Onun sözlərinə görə, Vaşinqton Ukrayna ordusunun Rusiya ərazisindəki hədəflərə zərbələr endirməsində iştirak edir.
Marko Rubio isə görüşdən əvvəl bildirib ki, hətta ən gərgin dövrlərdə belə ABŞ və SSRİ arasında əlaqələr saxlanılıb və nüvə dövlətləri arasında dialoqun olmamasını məsuliyyətsiz yanaşma adlandırıb.
Görüşdən sonra Rubio danışıqları yaxşı və səmimi adlandırıb. O qeyd edib ki, diplomatiya açıq mikrofonlar qarşısında aparılmır və müzakirələrin detalları barədə açıqlama verməyib.
ABŞ dövlət katibinin sözlərinə görə, Ukrayna münaqişəsinin həlli üçün həm Rusiya, həm də Ukraynanın qəbul edə biləcəyi yeni təkliflər və ideyalar lazımdır.
“Əgər sülh əldə olunacaqsa, bu, hansısa yeni ideya və konsepsiya sayəsində mümkün olacaq”, — deyə Rubio bildirib.
Rusiya Xarici İşlər Nazirliyinin məlumatına görə, görüş zamanı Ukrayna böhranının həlli, ABŞ-nin Ukraynaya silah tədarükü, iki ölkə arasında diplomatik əlaqələrin normallaşdırılması, Fars körfəzində vəziyyət, Roskosmos və NASA arasında əlaqələrin bərpası, eləcə də mədəni və parlamentlərarası əməkdaşlıq məsələləri müzakirə olunub.
Kreml isə görüşdən sonra tərəflər arasında təmasların müsbət olduğunu qeyd etsə də, həddindən artıq optimizmə qapılmamağa çağırıb.
Rusiya Prezidentinin mətbuat katibi Dmitri Peskov bildirib ki, hazırda yeni dinamika və ya sürətli irəliləyişdən danışmaq mümkün deyil.
01:25 25.07.2026
Oxunuş sayı: 46
