ABŞ Prezidenti Donald Tramp NATO-nun gücünü və kollektiv öhdəliklərini sınamaq niyyətində olduğunu açıqlayıb.
Crossmedia.az bu barədə xarici mediaya istinadən xəbər verir.
Tramp alyansın ABŞ-ni Meksika sərhədindən gələn qeyri-qanuni miqrantlardan qorumağa cəlb edilə biləcəyini irəli sürüb.
ABŞ prezidentinin sözlərinə görə, bu məqsədlə NATO-nun kollektiv müdafiəni nəzərdə tutan 5-ci maddəsinə müraciət etmək ideyası gündəmə gələ bilər. Tramp bildirib ki, belə bir addım NATO-nun “cəsarətini və real gücünü” nümayiş etdirə bilər.
“Bəlkə də NATO-nun cəsarətini sınamalıyıq. 5-ci maddəyə müraciət edib alyansı bura gəlməyə və cənub sərhədimizi qeyri-qanuni mühacirlərin növbəti müdaxilələrindən qorumağa məcbur etməliyik. Bu, çoxlu sayda Sərhəd Patrul agentini digər vəzifələr üçün azad edər”, – deyə Tramp qeyd edib.
Analitiklər hesab edirlər ki, bu açıqlama NATO-nun funksiyaları və miqrasiya məsələlərinin kollektiv müdafiə anlayışına daxil edilib-edilməməsi ilə bağlı ciddi müzakirələrə səbəb ola bilər.
