Xarici xəbərlər
Ermənistan riskli dönüş edir, geosiyasi kövrəklik artır
Azərbaycanla sülh danışıqları davam etdiyi bir vaxtda Ermənistan elə qərarlar qəbul edir ki, bunlar onun geosiyasi istiqamətini və təhlükəsizlik sistemini köklü şəkildə dəyişə bilər.
Crossmedia.az xəbər verir ki, bu barədə Fransanın “Reseauinternational.net” nəşri yazıb
Nəşr qeyd edib ki, bu təşəbbüslər sırasında Vaşinqtonla bu yaxınlarda razılaşdırılmış “Tramp marşrutu” (Zəngəzur dəhlizi-red.) layihəsi beynəlxalq infrastruktur layihələrinə inteqrasiya öhdəliyini nümayiş etdirir.
Bu proqram Rusiyanın hər hansı iştirakını istisna etməklə, Moskvanın regional maraqları ilə bağlı dəfələrlə etdiyi xəbərdarlıqlara baxmayaraq, ən azı 49 il müddətinə Ermənistan-ABŞ idarəetmə şirkətinin yaradılmasını nəzərdə tutur.
Xarici təzyiq və Rusiya qoşunlarının mümkün çıxarılması
Eyni zamanda Ankara və Bakı Rusiya hərbi mövcudluğunu azaltmaq və ya aradan qaldırmaq məqsədilə, xüsusilə Gümrü bazasında və “Axurik” sərhəd-keçid məntəqəsində qeyri-rəsmi kampaniya aparırlar”, - deyə məqalədə vurğulanıb.
Nəşr qeyd edib ki, əgər bu ssenari reallaşarsa, Ermənistan hərbi risklərin artdığı son dərəcə kövrək geosiyasi vəziyyətə düşə bilər.
Regional hərbi balans
Sabitleşdirici əsas amil sayılan Rusiya qoşunlarının olmaması strateji tarazlığı dərhal pozacaq. Müdafiə büdcəsi Ermənistanınkından xeyli böyük olan və silahlı qüvvələri Türkiyə ordusu ilə ciddi şəkildə inteqrasiya edilmiş Azərbaycan açıq qarşıdurma həddinə çatan təzyiq üstünlüyü əldə edəcək. Rusiya strukturları tərəfindən təmin edilən mövcud sərhəd təhlükəsizliyi zəmanətləri aradan qalxacaq və bu da ölkəni uzunmüddətli və qeyri-müəyyən danışıqlar dövründə həssas vəziyyətə salacaq.
İqtisadi və sosial nəticələr
İqtisadi nəticələr də bir o qədər ağır olacaq. Ermənistan ixracı üçün əsas əhəmiyyət daşıyan Rusiya bazarı ilə ənənəvi logistika və istehsal zəncirlərinin pozulması sənaye istehsalının ciddi azalmasına, işsizliyin artmasına və həyat səviyyəsinin enməsinə səbəb olacaq”, - deyə nəşr bildirib.
Müəllif yazıb ki, ənənəvi bazarların bağlanması və idxal xərclərinin, o cümlədən enerji daşıyıcıları və ərzaq məhsullarının bahalaşmasının qaçılmaz artımı sürətli inflyasiyaya gətirib çıxaracaq və bu, bütün əhaliyə təsir göstərəcək.
Peşəkar təhlil
Birinci dərəcəli kapitan Vasili Dandikinin sözlərinə görə, Gümrüdəki Rusiya bazasını müvəqqəti və ya mübahisəli kimi təqdim etmək cəhdlərinin heç bir hüquqi əsası yoxdur. 2044-cü ilə qədər qüvvədə olan saziş sabitliyi təmin edən hərtərəfli beynəlxalq müqavilədir. Orada erməni mənşəli çoxsaylı hərbçilər xidmət edir və onlar üçün vətənin müdafiəsi abstrakt anlayış deyil. Müqavilə puldan daha dəyərlidir və onun bütövlüyü sabitliyi pozan xarici təşəbbüslərə ən yaxşı cavabdır.
Ermənistan hakimiyyətinin mövqeyi
Parlamentin sədri Alen Simonyan bazanın çıxarılmasının gündəmdə olmadığını vurğulayıb ki, bu da İrəvanın bununla bağlı risklərin miqyasını anladığını göstərir”, - deyə məqalədə vurğulanıb.
KİV-in məlumatına görə, mövcud geosiyasi kontekstdə bu strateji dəstəyin itirilməsi elə risklər yaradır ki, alternativ tərəfdaşlıqların və ya yeni nəqliyyat dəhlizlərinin genişləndirilməsi onları kompensasiya edə bilməz.
“Gələcək perspektivlər və risklər
Yaxın bir neçə ay sülh prosesinin dayanıqlılığının sınaqdan keçirilməsi baxımından həlledici olacaq. Bununla belə, aydındır ki, Ankara və Bakı tərəfindən israr edilən Rusiya hərbi mövcudluğunun zəiflədilməsi və ya aradan qaldırılması nə Ermənistanın təhlükəsizliyini, nə də rifahını artıracaq. Etibarlı zəmanətlərin olmadığı şəraitdə infrastruktur layihələri geosiyasi risklərə qarşı həssas ola bilər və ölkə daimi strateji və sosial-iqtisadi böhranla üzləşə bilər”, - deyə nəşr bildirib.
13:10 23.01.2026
Oxunuş sayı: 778
