Ermənistan katolikosu II Qareginə qarşı yeni cinayət işi hazırlana bilər
Ermənistan hüquq-mühafizə orqanlarının bütün ermənilərin katolikosu II Qareginə qarşı yeni cinayət işi hazırladığı bildirilir.
Crossmedia.az bu barədə "Hraparak" qəzeti məlumat yayıb. Nəşrin yazdığına görə, mümkün istintaq çirkli pulların yuyulması şübhələri ilə bağlıdır.
Məlumata əsasən, araşdırma Eçmiədzin Fondu tərəfindən kilsəyə məxsus televiziya kanalının direktoru Şoqakat Mane Qazaryana verilmiş və sonradan satılmış mənzillə əlaqədardır. Bildirilir ki, sözügedən əmlakla bağlı maliyyə əməliyyatları istintaqın diqqət mərkəzindədir.
Şoqakat Mane Qazaryan artıq şahid qismində dindirilib. O, İstintaq Komitəsinə çağırıldığını təsdiqləyərək bildirib ki, ona qarşı irəli sürülən iddialar əsassızdır və məsələ televiziya kanalının fəaliyyəti ilə əlaqəli deyil.
Ermənistan Prokurorluğu isə məsələ ilə bağlı hələlik rəsmi açıqlama verməyib. Hadisə ölkədə kilsə və hakimiyyət münasibətləri fonunda yeni müzakirələrə səbəb olub.
12:48 23.01.2026
Oxunuş sayı: 559
