Zelenski “vacib qərarlar” barədə mesaj verib
Ukrayna Prezidenti Volodimir Zelenski Rusiya-Ukrayna müharibəsinə son qoymaq üçün diplomatik səylərin davam etdiyini bildirib. Onun sözlərinə görə, Yeni ildən əvvəl mühüm qərarların verilməsi mümkündür.
Crossmedia.az xarici KİV-ə istinadən xəbər verir ki, Zelenski sosial media paylaşımında hazırkı dövrü ilin ən aktiv diplomatik günlərindən biri kimi dəyərləndirib. O qeyd edib ki, “Yeni ildən əvvəl bir çox qərarlar verilə bilər və biz buna nail olmaq üçün hər şeyi edirik. Lakin bu qərarların verilib-verilməməsi müttəfiqlərdən asılıdır”.
Ukrayna dövlət başçısı Rusiya ordusunun ölkəsinə qarşı hava hücumlarını davam etdirdiyini vurğulayıb. Onun sözlərinə görə, Rusiya mülki və enerji infrastrukturunu hədəf almaqda davam edir.
Zelenski bildirib ki, təkcə son bir həftə ərzində Rusiya Ukraynaya 2100-dən çox pilotsuz uçuş aparatı, təxminən 800 idarə olunan hava bombası və 94 raket atıb. O əlavə edib ki, bu hücumlar Ukraynanın təhlükəsizliyi ilə bağlı qərarların təcili şəkildə qəbul edilməsinin vacibliyini bir daha göstərir.
Türkan Kərimli
20:02 28.12.2025
Oxunuş sayı: 3923
