Rəşad Məcid: Ümid yerimiz məhz Heydər Əliyev idi
Ulu Öndər Heydər Əliyevin Azərbaycan mediasına münasibəti haqqında danışanda, həmin dövrün mətbuat mühitini yaxından yaşayan insanların xatirələri ən etibarlı mənbəyə çevrilir. Həmin illərin çətinliklərini, qəzetlərin yaşaması uğrunda aparılan mübarizəni və dövlətin bu sahəyə göstərdiyi tarixi dəstəyi nəzərə aldıqda, Heydər Əliyevin media siyasətinin əslində modern jurnalistikanın təməlini qoyduğunu aydın görürük. Elə buna görə də o dövrün mətbuat nümayəndələrinin fikirləri bu gün bir daha təsdiq edir: Heydər Əliyevin media xətti yalnız siyasət deyil, həm də milli məsuliyyət modeli idi.
Mətbuat Şurasının sədri Rəşad Məcid Crossmedia.az-a Ulu Öndər Heydər Əliyevin Azərbaycan mediasına verdiyi dəyərdən və onun mətbuatın ən ağır dönəmlərində göstərdiyi prinsipial dəstəkdən danışıb. Onun sözlərinə görə, Heydər Əliyevin media siyasəti bu gün Azərbaycan jurnalistikasının dayanıqlı inkişaf xəttinin əsasını təşkil edir: " Ulu Öndərlə təmaslar əsasən mətbuatla bağlı görüşlərdə baş tutub və həmin görüşlər Heydər Əliyevin media sahəsində nə qədər uzaqgörən və məsuliyyətli lider olduğunu göstərib. 90-cı illərin sonlarında mətbuat ciddi iqtisadi böhran yaşayırdı. Qəzetlər fəaliyyətini davam etdirməkdə çətinlik çəkirdi. Dövlətin müdaxiləsi olmasaydı, bu sahənin tam çökməsi real təhlükə idi. Ümid yerimiz məhz Heydər Əliyev idi".
Onun sözlərinə görə, Ulu Öndərin media sahəsində həyata keçirdiyi islahatlar jurnalistikaya ikinci nəfəs verdi: “1998-ci ildə senzuranın ləğvi, əlavə dəyər vergisinin götürülməsi, qəzet kağızına tətbiq edilən gömrük rüsumlarının aradan qaldırılması, mətbuatın maddi-texniki bazasının gücləndirilməsi — bütün bunlar mətbuatın ayaqda qalması üçün həyati əhəmiyyət daşıyırdı.”
R.Məcid xatırladıb ki, 2001-ci ildə redaktorlarla keçirilən görüş Ulu Öndərin mediaya yanaşmasının ən real göstəricilərindən biri idi: “Heydər Əliyev hər birimizi diqqətlə dinlədi. Mən jurnalistlərin mənzil problemi haqqında danışdım. Qısa müddətdə mətbuatın borclarının dondurulması və silinməsi, AzərTAC-ın xəbər xidmətinin qəzetlərə ödənişsiz açılması kimi qərarlar həmin görüşün birbaşa nəticəsi idi. Heydər Əliyev mətbuatın cəmiyyətdə rolunu dərindən anlayan nadir dövlət xadimlərindən idi. Mən onu həmişə "jurnalistlərin dostu" adlandırmışam. Təsadüfi deyil ki, 2002-ci ildə məhz jurnalistlər tərəfindən "Jurnalistlərin dostu" mükafatına layiq görüldü. Ulu Öndərin zarafatla "Nəhayət, jurnalistlərin xoşuna gəlmişəm" deməsi onun media ilə səmimi münasibətinin göstəricisi idi.”
Rəşad Məcid ən yaddaqalan məqamlardan biri kimi Milli Mətbuat Günündə baş tutan görüşü qeyd edib: “22 iyulda redaktorlarla 3 saatdan artıq davam edən söhbət bütün suallara açıq cavablar, xüsusən Qarabağ mövzusunda ilk dəfə açıqladığı faktlar Heydər Əliyevin mətbuata yüksək etimadının ən bariz nümunəsi idi. Bu gün Azərbaycan mediasının formalaşma tarixini araşdıran hər kəs üçün bir həqiqət aydındır. 90-cı illərin sonu və 2000-ci illərin əvvəlləri Heydər Əliyevin media siyasətinin təməl dövrü idi. O dövrdə yaradılan şərait bu gün də jurnalistikamızın inkişaf xəttində öz təsirini qoruyur.”
Fatimə Hacıəliyeva
17:23 12.12.2025
Oxunuş sayı: 1041
