Azərbaycan- Türkiyə hərbi əməkdaşlığı yeni mərhələyə keçir- Şərh
Azərbaycan–Türkiyə hərbçiləri arasında aparılan müzakirələr iki qardaş ölkənin müdafiə sahəsində əməkdaşlığının yeni mərhələyə qədəm qoyduğunu göstərir. Bu dialoqlar yalnız hərbi hazırlıq məsələləri ilə məhdudlaşmır, həm də regional təhlükəsizlik arxitekturasının formalaşmasında strateji rol oynayacaq istiqamətləri əhatə edir. Müzakirələrin əsas xəttini birgə təlimlərin genişləndirilməsi, müasir silah sistemlərinin tətbiqi, kadr hazırlığının təkmilləşdirilməsi və əməliyyat-taktiki əməkdaşlığın daha yüksək səviyyəyə qaldırılması təşkil edir.
Bu təlimlərin region üçün əhəmiyyəti isə xüsusilə diqqətəlayiqdir. Çünki Azərbaycan–Türkiyə hərbi əməkdaşlığı təkcə iki ölkənin müdafiə potensialını gücləndirmir, həm də Cənubi Qafqazda sabitlik, balans və təhlükəsizliyin təminatçısına çevrilir. Birgə təlimlər orduların qarşılıqlı uyumluluğunu artırmaqla yanaşı, mümkün risk və təhdidlərə daha çevik və koordinasiyalı reaksiya vermək imkanlarını genişləndirir. Bu isə regionda sülhün qorunması, yeni geosiyasi reallıqların möhkəmlənməsi və hərbi-siyasi qüvvələr nisbətinin stabil saxlanması baxımından mühüm əhəmiyyət kəsb edir.
Mövzu ilə bağlı hərbi ekspert İbrahim Rüstəmli Crossmedia.az-a açıqlama verib:
"İlk növbədə onu demək istəyirəm ki, ordu canlı bir orqanizmdir. Ordu bir insan obrazı kimi özündə yaşamalı və yaşatmalı olduğu dəyərləri birləşdirən bir məkandır. Məşhur qırğız yazıçısı Çingiz Aytmatovun gözəl bir sözü var: “Bu dünyada ən çətin iş hər gün eyni insan olaraq qalmaqdır.” Bu sözün fəlsəfəsi və psixologiyası, bu fikrin arxasında dayanan məqamlar o qədər zəngin və əhəmiyyətlidir ki, fikrimcə, bunu həm də orduya şamil etmək olar. 1991-ci ilin sonu, 1994-cü ilin əvvəllərində Azərbaycan Ordusunda xidmətə başlamışam və bu dövr ərzində Azərbaycan Ordusunun keçdiyi yolun həm şahidinə çevrilmişəm, həm də o yolu müəyyən mənada tarixləşdirən, sənədləşdirən bir hərbi jurnalist olmuşam. 1991-ci ildə biz ordunu qurmaq üçün o qədər bəsit imkanlara sahib idik ki, təsəvvür etmək belə çətindir. Bugünkü ordumuzu o dövrün hələ yeni dil açan, yeriməyə başlayan ordusu ilə müqayisə etmək mümkün deyil".
Ekspert qeyd edib ki, hər bir insan hər gün yeni nəsə öyrənməlidir ki, bir addım irəli getsin: "Aytmatov da bunu demək istəyirdi. Bunu orduya da şamil etmək olar. Ordumuz ona görə şanslıdır ki, onun mənsub olduğu dövlətdə Türkiyə kimi ona minimum təmənna ilə münasibət bəsləyən qardaş bir ölkə var. Əlbəttə, Türkiyənin də Azərbaycanla münasibətlərində müəyyən maraqları var. Siyasətdə tam təmənnasızlıq olmur. Amma Azərbaycanla əlaqələrində Türkiyə digər ölkələrlə müqayisədə ən az təmənna güdən dövlətdir. Bu birinci məqamdır. İkincisi, Azərbaycan ona görə şanslıdır ki, onun ən böyük strateji tərəfdaşı olan Türkiyə dövləti də öz ordusunu döyüşə-döyüşə yaradıb. Birinci Dünya Müharibəsindən Türkiyə ağır itkilərlə çıxmışdı. Bütün resursları tükənmişdi, amma ölkə ordusunu yenidən qurmağı bacardı və qələbə qazandı. Türkiyə dövləti üçün ordu quruculuğu hər zaman prioritet olub. Bizdə də belədir, amma müəyyən çatışmazlıqlar hələ də qalmaqdadır".
İ.Rüstəmli əlavə edib ki, Türkiyə döyüşə-döyüşə öz ordusunu quran bir dövlət kimi çox ciddi Silahlı Qüvvələr quruculuğu təcrübəsinə malikdir: "Və Azərbaycanın da ən böyük strateji tərəfdaşı olaraq biz o ölkədən çox şey öyrənə bilərik və öyrənirik də. Bu gün təhsil sistemində, ordu quruculuğunun digər strateji sahələrində Türkiyə təcrübəsindən ciddi şəkildə bəhrələnirik. Bu isə bizim üçün yalnız pozitiv nəticələr doğurur".
Hərbi ekspert son olaraq bildirib ki, Türkiyə ilə əlaqələrin gücləndirilməsi Azərbaycan üçün böyük üstünlükdür: "Çünki Türkiyə həm hava, həm quru, həm sərhəd təhlükəsizliyi sahəsində çox ciddi üstünlüklərə malikdir. Bu gün Türkiyə son yüz ilin ən güclü silah sənayesi inkişafına sahibdir. Yalnız silah istehsalı yox, həm də bu silahların tətbiqi, onların idarə olunması üzrə kadr hazırlığı sistemli şəkildə qurulub. Azərbaycan bu təcrübədən maksimum bəhrələnməlidir. Bu əməkdaşlıq təkcə orduda deyil, digər sahələrdə də özünü göstərir. Məsələn, qardaşımın oğlu Daxili Qoşunlar Akademiyasına yüksək balla qəbul olunduğu üçün onu Türkiyə Jandarm Akademiyasına göndərdilər. Orada fərqli bir təhsil sistemi var – ideologiya, dövlətçilik prinsipləri, şəxsi məsuliyyət, xidmət etikasına qədər hər bir sahə kompleks şəkildə öyrədilir. Bu, kadrların daha peşəkar yetişməsinə imkan yaradır. Bu mənada çox sevinirəm ki, artıq Türkiyə dövlətinin və Azərbaycan Respublikasının Prezidentləri arasında imzalanmış yüksək səviyyəli sənədlər əsasında əməkdaşlıq daha da genişlənir. Bu, bizim üçün böyük bir irəliləyişdir. Azərbaycan Ordusunun Türkiyə Ordusundan öyrənməli olduğu çox məsələ var və bu əməkdaşlığın inkişafı ordu quruculuğunda müstəsna rol oynayacaq".
Ayhan
10:43 11.12.2025
Oxunuş sayı: 1519
