ABŞ İbrahim Razılaşmalarını yeniləyir — Azərbaycan və Qazaxıstan əsas hədəfdə
İtaliyanın Asia News agentliyində Vladimir Rozanskinin “İbrahim Razılaşmalarının yenidən işə salınması” mövzusunda məqaləsi dərc olunub. Müəllifin yazdıqlarına görə, ABŞ Prezidenti Donald Trampın İbrahim Razılaşmalarını bərpa etmək təşəbbüsü İsrailin BƏƏ, Mərakeş və Sudan kimi “mötədil” ərəb ölkələri ilə münasibətlərinin normallaşdırılmasına yönəlib və indi bu proses Cənubi Qafqaz və Mərkəzi Asiyanın müsəlman ölkələrinə — Azərbaycan və Qazaxıstana qədər genişləndirilir. Əsas məqsəd isə Qəzzada döyüşlərin dayandırılması və uzunmüddətli atəşkəsə nail olunmasıdır.
Crossmedia.az bu barədə Asia News agentliyinə istinadən xəbər verir.
Məqalədə qeyd olunur ki, Qəzzadakı müharibə İsrail–Səudiyyə Ərəbistanı dialoqunu ləngidib. Bu dialoq davam etsəydi, İsrailin regionun ABŞ-yə yaxın rejimləri və müsəlman, amma ərəb olmayan ölkələrlə — Pakistan, Malayziya, İndoneziya ilə yaxınlaşmasına yol aça bilərdi.
Rozanski yazır ki, İbrahim Razılaşmaları 2.0 versiyası Moskva–Pekin oxuna qarşı böyük iqtisadi, siyasi və hərbi alyansın yaradılmasını nəzərdə tutur və həmçinin İranın qarşısının alınmasına xidmət edir.
Mənbəyə görə, Azərbaycan bu prosesdə əsas iştirakçılardan biri hesab olunur — İsraillə yaxın əlaqələr, həmçinin Mərkəzi Asiya və türk dünyası üçün “körpü” rolunu oynaya bilməsi səbəbindən. Qazaxıstan yenilənmiş razılaşmalara qoşulan ilk ölkə olub — bunu prezident Kasım-Jomart Tokayev 7 noyabrda Vaşinqtonda C5+1 görüşündə elan edib. ABŞ-nin regiona marağı Rusiyanın Ukraynaya müdaxiləsindən sonra daha da artıb. Qazaxıstan Mərkəzi Asiyanın ən böyük iqtisadiyyatıdır və bölgəyə yönələn ABŞ ixracının 96%-ni təmin edir. Qazaxıstanın nadir torpaq elementləri və uran kimi strateji minerallar bazarında artan rolu Vaşinqton üçün xüsusi əhəmiyyət daşıyır. Rozanskinin sözlərinə görə, Mərkəzi Asiya ABŞ və Çin arasındakı geosiyasi rəqabətin əsas meydanına çevrilir. Bunu Çin xarici işlər naziri Van İnin bölgəyə son səfəri də təsdiqləyir.
Günel Verdiyeva
16:58 24.11.2025
Oxunuş sayı: 2760
