Bəqayi: İran ABŞ-nin danışıqlara dair yanaşmasını qəbul etmir
Bu gün İran Xarici İşlər Nazirliyinin sözçüsü İsmayıl Bəqayi mətbuat konfransında bildirib ki, məsələnin mərkəzində vasitəçilik deyil, ABŞ-nin danışıqlara yanaşması dayanır.
Crossmedia.az xarici mediaya istinadən xəbər verir ki, onun sözlərinə görə, Vaşinqton prosesə kifayət qədər ciddi yanaşmır və diplomatik prinsiplərə deyil, “tətbiq və diktəyə əsaslanan” siyasət yürüdür.
Sözçü vurğulayıb ki, Amerika bu mövqedə israr etdiyi müddətcə “mənalı danışıqlar mümkün olmayacaq”. O, qeyd edib ki, Səudiyyə Ərəbistanı ilə münasibətlər müsbətdir və İran bölgədə gərginliyin azaldılması üçün Ər-Riyadın və digər ölkələrin səylərini yüksək qiymətləndirir.
Rəsmi Tehranın mövqeyinə görə, hazırkı şəraitdə əsas problem nə vasitəçilik, nə də danışıqların formatıdır — əsas maneə ABŞ-nin mövcud siyasətidir.
21:40 23.11.2025
Oxunuş sayı: 3150
