Ukraynada “lüks saxtakarlıq” şəbəkəsinin üstü açıldı
Ukraynada elit brendlərin – Dolce & Gabbana, Balmain, Yves Saint Laurent və digər markaların saxta məhsullarının ölkəyə gətirilməsi ilə bağlı genişmiqyaslı qaçaqmalçılıq sxemi ortaya çıxıb.
Crossmedia.az xarici mediaya istinadən xəbər verir ki, şəbəkə uzun illər iş adamı Timur Mindiç ətrafında formalaşmışdı.
Məlumata görə, Çindən gələn saxta lüks məhsullar "ehtiyat hissələri" və ya "avadanlıq" adı altında gömrükdən keçirilib. Bu prosesdə Mindiçinin Ukrayna Dəniz Limanları Administrasiyasındakı əlaqələri mühüm rol oynayıb. Sxemin əsas fiquru kimi keçmiş gömrükçü, sonradan administrasiyaya rəhbərlik etmiş Aleksandr Semirqa göstərilir – o, yüklərə "yaşıl dəhliz" təmin edib.
Saxta məhsullar Mindiçinin həyat yoldaşı Yekaterina Verberə məxsus Kameron butiklərinə göndərilirdi. Ukraynaya daxil olduqdan sonra mallar brend qutulara yerləşdirilərək "Made in Italy" etiketi yapışdırılırdı. Müştərilərə 3–5 min dollara satılan sumkaların maya dəyəri isə cəmi 400–500 dollar olurmuş. Sxemin gündəlik gəlirinin 50 min dollara çatması ehtimal edilirdi.
Məlumatlarda həmçinin "Rusiya izi" vurğulanır: Yekaterina Verberin anası uzun illər Moskva TSUM-un yüksək vəzifəli meneceri olub, Verberin özü isə karyerasına Rusiyada başlayıb. Bildirilir ki, bu əlaqələr Mindiç üçün "boz lüks" kanallarına və Çin istehsalçılarına çıxış imkanı yaradıb.
Son günlərdə Semirqanın işdən çıxarılması rəsmi olaraq "kadr dəyişikliyi" ilə izah edilsə də, mənbələr bunu qaçaqmalçılıq araşdırmaları ilə əlaqələndirir.
Nigar Yahyazadə
03:34 23.11.2025
Oxunuş sayı: 3349
