Prosesin şəffaf şəkildə aparılması ölkəmizin beynəlxalq ədalət prinsiplərinə hörmətini sübut edir - RƏY
Bakı Hərbi Məhkəməsində Ruben Vardanyan, Artur Sarkisyan və digər erməni separatçılarının işi üzrə məhkəmə prosesi davam edir. Azərbaycan ictimaiyyətinin xüsusi diqqətində olan bu proses yalnız cinayət məsuliyyətinin müəyyənləşdirilməsi ilə məhdudlaşmır; o, eyni zamanda 30 illik işğal dövründə törədilən qanunsuzluqlara, terror aktlarına və insanlıq əleyhinə əməllərə hüquqi qiymət verilməsi baxımından tarixi əhəmiyyət daşıyır. Məhkəmə iclasları bir daha göstərir ki, regionda yeni reallıqlar təkcə siyasi və hərbi səviyyədə deyil, hüquqi müstəvidə də öz təsdiqini tapmaqdadır. Bu proses həm beynəlxalq hüququn tələblərinə uyğun şəkildə məsuliyyətin fərdiləşdirilməsi prinsipini həyata keçirir, həm də Azərbaycan dövlətinin ədalətə verdiyi dəyərin real təzahürüdür. İşğal siyasətinin maliyyələşdirilməsində, separatizmin təşviqində və terrorçu qrupların dəstəklənməsində rol oynamış şəxslərin məhkəmə qarşısına çıxarılması, Azərbaycanın suverenliyinin bərpasından sonra hüquqi hesablaşma mərhələsinin başladığını nümayiş etdirir.
Məsələ ilə bağlı AMEA Fəlsəfə və Sosiologiya İnstitutunun “İnformasiya cəmiyyətinin fəlsəfi və sosioloji problemləri” şöbəsinin müdiri, fəlsəfə doktoru Məhəmməd Cəbrayılov Crossmedia.az-a açıqlama verib:
"Ruben Vardanyan, Artur Sarkisyan və digər separatçılarla bağlı məhkəmə prosesi keçmişlə bu gün arasındakı kəskin fərqi aydın şəkildə göstərdi. Əgər bir zamanlar Azərbaycan torpaqlarında qanunsuz rejimlər və silahlı dəstələr fəaliyyət göstərirdisə, bu gün ədalət, qanun və dövlət suverenliyi hökm sürür. Bu, müstəsna haldır. Keçmişlə bu günü müqayisə etdikdə, nəticə aydındır. Bu məhkəmə sadəcə hüquqi prosedur deyil, bu proses tarixə ədalətin bərpası kimi düşür. Vardanyan və digərlərinin tutulması separatizmin tabutuna vurulan son mismar oldu. Azərbaycan 30 il ərzində tapdalanan ədaləti bərpa etməklə yanaşı, bütün dünyaya göstərdi ki, qanun qarşısında heç kim toxunulmaz deyil həmçiinin bu proses bir tərəfdən siyasi və ideoloji, digər tərəfdən isə mənəvi baxımdan böyük əhəmiyyət daşıyır xalqımıza qarşı törədilən cinayətlərin unudulmadığını nümayiş etdirir, eyni zamanda müasir Azərbaycanın ədalətə əsaslanan yeni mərhələyə qədəm qoyduğunu göstərir. Çünki beynəlxalq miqyasda Azərbaycanın məsuliyyətli və hüquqa hörmət edən dövlət imicini daha da möhkəmləndirdi”.
Politoloqun sözlərinə görə, cənab prezidentin müxtəlif ölkələrə səfərləri və yüksək səviyyəli qarşılanması da göstərir ki, Azərbaycanın beynəlxalq nüfuzu artıb. 44 günlük müharibə və antiterror əməliyyatlarından sonra Azərbaycan artıq zərərçəkən deyil, ədalətin təminatçısına çevrilib. Ruben Vardanyan və digər separatçılarla bağlı məhkəmə prosesi Azərbaycanın hüququn aliliyinə sadiqliyini göstərir. Prosesin şəffaf şəkildə aparılması ölkəmizin beynəlxalq ədalət prinsiplərinə hörmətini sübut edir. Biz bu prosesi sadəcə cəza tədbiri kimi deyil, insanlığa qarşı törədilmiş cinayətlərin hüquqi qiymətləndirilməsi kimi dəyərləndirməliyik. Bu sadə cinayət işi deyil bu, beynəlxalq hüququ pozan, terrorizm və separatizmə dəstək verən şəxslərə qarşı aparılan ədalətli mühakimədir. Azərbaycan bu məsələlərin öhdəsindən tam gəlir və bu, dövlətimizin suverenliyinin bərpasının mühüm mərhələsidir, Azərbaycan bu məhkəmə vasitəsilə beynəlxalq ictimaiyyətə aydın mesaj verir: heç bir halda separatizmə, terrora və etnik nifrətə güzəşt edilməyəcək. Amma bütün bunlar beynəlxalq hüquq və qanun çərçivəsində həyata keçirilir. Bu, Azərbaycanın məsuliyyətli və sivil dövlət imicini daha da gücləndirir”.
M. Cəbrayılov həmçinin qeyd edib ki, bu proses regionda ədalətə əsaslanan sülhün bərpasına mühüm töhfə verir: "Məhkəmə həm siyasi, həm ideoloji, həm də mənəvi baxımdan tarixə düşəcək bir hadisədir. Çünki bu, Azərbaycan xalqının 30 illik ədalət axtarışının simvoluna çevrilib və həmçinin Nürnberq Məhkəməsi necə ki, insanlıq əleyhinə cinayətlərə qarşı beynəlxalq ədalətin bərpası idi, bu gün Bakıdakı proses də həmin missiyanın davamıdır. Azərbaycan faktiki olaraq beynəlxalq ədalət prinsiplərini öz üzərinə götürüb və bunu şərəflə həyata keçirir".
11:01 25.10.2025
Oxunuş sayı: 1036
