Azərbaycanla Ukrayna arasında bu sahədə əməkdaşlıq genişlənir - AÇIQLAMA
Azərbaycan Ukrayna minatəmizləyənlərinə təlimlər keçirməyə hazırlaşır. ANAMA ilə Ukrayna Fövqəladə Hallar Xidməti arasında imzalanan Memorandum ölkədə humanitar minatəmizləmə sahəsində əməkdaşlığın gücləndirilməsini təmin edəcək.
Bu barədə Crossmedia.az-a danışan hərbi ekspert Ədalət Verdiyev bildirib ki, ANAMA hazırda dünyada minatəmizləmə sahəsində ən böyük təcrübəyə malik strukturlardan biridir: "ANAMA-nın təcrübəsi bir neçə ölkə tərəfindən öyrənilir. Ukrayna tərəfində minatəmizləmə ilə məşğul olan qurum ölkənin Fövqəladə Hallar Xidmətidir və hazırda minatəmizləmə sahəsində Ukrayna tərəfinin Azərbaycan ilə əməkdaşlıq etməsi, bu əməkdaşlığın genişləndirilməsi tamamilə məqsədəuyğun bir addımdır".
Ekspert qeyd edib ki, Azərbaycanın yerli istehsalı olan minatəmizləmə robotları Ukrayna ərazilərini partlamamış sursatlardan və minalardan təmizləməkdə kifayət qədər geniş istifadə olunur: "Həmin avadanlıqların Ukraynada tətbiqi ilə bağlı azərbaycanlı heyətlər bir müddət Ukrayna ərazisində təlimlər keçmiş, yerli mütəxəssislərin hazırlanması ilə məşğul olmuşlar.
Azərbaycanla Ukrayna arasında minatəmizləmə sahəsində əməkdaşlıq yeni məsələ deyil. Hesab olunur ki, belə əməkdaşlığın gücləndirilməsi və genişləndirilməsi hər iki ölkənin milli və dövlət maraqlarına tamamilə uyğundur".
Türkan Kərimli
17:35 23.10.2025
Oxunuş sayı: 1920
