Azərbaycan regionun logistika və kommunikasiya mərkəzinə çevrilib - DEPUTAT
Azərbaycanın tranzit və nəqliyyat-kommunikasiya sahəsində əldə etdiyi nailiyyətlər ölkənin beynəlxalq arenada iqtisadi və geostrateji əhəmiyyətini daha da artırır. Son illərdə həyata keçirilən iri infrastruktur layihələri, modern logistika mərkəzlərinin yaradılması və beynəlxalq tərəfdaşlarla səmərəli əməkdaşlıq nəticəsində Azərbaycan regionun əsas nəqliyyat qovşaqlarından birinə çevrilib. Bu tendensiyanın bariz nümunəsi kimi Şərq-Qərb marşrutu üzrə daşınan yüklərin həcminin 90 faiz artması göstərilə bilər.
Bu barədə məlumat verən xarici işlər naziri Ceyhun Bayramov estoniyalı həmkarı Marqus Tsaxkna ilə birgə keçirdiyi mətbuat konfransında bildirib ki, nəqliyyat-kommunikasiya sahəsi Avropa İttifaqı ilə Azərbaycan arasındakı münasibətlərdə daim prioritet istiqamətlərdən biri olub. Onun sözlərinə görə, Rusiya-Ukrayna müharibəsindən sonra bu mövzu daha da aktuallaşıb və regionda yeni logistika reallıqları formalaşmaqdadır.
Nazir əlavə edib ki, TRİPP marşrutunun reallaşması halında 15 milyon tonadək yükün daşınması mümkün olacaq. Bu isə təkcə Azərbaycan üçün deyil, həm də Asiya ölkələri üçün geniş ticarət və iqtisadi imkanlar yaradacaq. Ceyhun Bayramovun vurğuladığı kimi, bu marşrutun inkişafı region ölkələri arasında inteqrasiyanı gücləndirəcək, Avropa və Asiya bazarları arasında dayanıqlı və səmərəli əlaqələrin qurulmasına şərait yaradacaq.
Bütün bu proseslər Azərbaycanın “Böyük İpək Yolu”nun müasir formatında – Orta Dəhlizdə əsas oyunçuya çevrildiyini göstərir. Azərbaycan həm coğrafi mövqeyinin, həm də ardıcıl həyata keçirilən nəqliyyat siyasətinin sayəsində Avrasiyanın enerji, ticarət və logistika xəritəsində mərkəzi yer tutur. Bu istiqamətdə atılan addımlar ölkəmizin regional əməkdaşlıqda rolunu möhkəmləndirməklə yanaşı, dayanıqlı iqtisadi inkişafına da mühüm töhfə verir.
Bu barədə Milli Məclisin deputatı Vüqar Rəhimzadə Crossmedia.az-la öz fikirlərini bölüşüb: "Ölkəmiz Şərq-Qərb və Şimal-Cənub nəqliyyat dəhlizlərinin kəsişmə nöqtəsində yerləşməklə regionun logistika və kommunikasiya mərkəzinə çevrilib. Hər iki dəhlizin inkişafı istiqamətində həyata keçirilən infrastruktur layihələri - dəmir yolları, avtomobil magistralları, limanlar və gömrük sistemlərinin modernləşdirilməsi Azərbaycanın beynəlxalq nəqliyyat şəbəkəsində mövqeyini daha da möhkəmləndirib. Bu gün dünyada çox aktual olan və strateji əhəmiyyət kəsb edən Trans-Xəzər Beynəlxalq Nəqliyyat Marşrutu - Orta Dəhliz və digər nəqliyyat layihələri Azərbaycanın geosiyasi çəkisini artırmaqla yanaşı, ölkəmizi regional əməkdaşlıq və iqtisadi inteqrasiyanın əsas hərəkətverici qüvvəsinə çevirir. Çin və Orta Asiya ölkələrini Avropa dövlətləri ilə birləşdirməkdə əsas nəqliyyat-logistika marşrutu olan Orta Dəhliz regional və qitələrarası ticarətin möhkəmlənməsində strateji rol oynayır. Çindən Azərbaycana daşımaların həcmi getdikcə çoxalır və 2030-cu ilədək bu daşımaların hazırkı dövrlə müqayisədə 3 dəfə artması proqnozlaşdırılır. Bu isə öz növbəsində layihənin əhəmiyyətini daha da artırır. Eyni zamanda, Rusiyaya qarşı tətbiq edilən sanksiyalar nəticəsində Avropa İttifaqı ölkələri alternativ nəqliyyat marşrutlarından istifadə etməyə üstünlük verirlər. Bu şəraitdə Orta Dəhliz həm Şərqlə-Qərb arasında təhlükəsiz, həm də səmərəli ticarət körpüsü rolunu gücləndirib. Zəngəzur dəhlizinin reallaşması ilə 15 milyon ton yükün daşınması reallaşa bilər".
Parlamentari söyləyib ki, Prezident İlham Əliyev bugünlərdə Qazaxıstana səfərdə olarkən mətbuata bəyanatında qeyd etdi ki, keçən il Trans-Xəzər Beynəlxalq Nəqliyyat Marşrutu üzrə yükdaşımaların həcmi 62 faiz artıb və 4,5 milyon ton təşkil edib: "Dövlətimizin başçısı bildirdi ki, bu ilin nəticələri də ümidvericidir, artım 2 faiz təşkil edib. Xarici tərəfdaşlarla “darısqal yerlər” adlanan problemlərin sinxron şəkildə aradan qaldırılması, dəhliz boyunca uzunmüddətli vahid tariflərin müəyyənləşdirilməsi üzərində işləyirik. Sözsüz ki, bu, səmərəliliyi artıracaq, bütün marşrut üzrə fasiləsiz tədarükləri təmin edəcək və bizim planlaşdırdığımız kimi, yükdaşımaların həcmini 10 milyon tona çatdırmağa imkan verəcək. Bundan başqa, limanlarımızın terminal gücünün inkişafının əhəmiyyəti qeyd olunub. Qazaxıstan Aktauda konteyner habı inşa edir. Ələt limanında yük terminalının xarici, o cümlədən çinli tərəfdaşların iştirakı ilə tikilməsi yaxşı perspektivlər açır. Danışıqlar zamanı yüklərin ixracı üçün yeni Trans-Xəzər bərə sisteminin yaradılması imkanı da müzakirə edilib".
Deputat, həmçinin Asiyadan Avropaya və əks istiqamətdə Azərbaycan vasitəsilə tranzit edilən keçən yüklərin həcmi böyük artım potensialına malik olduğunu qeyd edib. Onun fikrincə, bu, Azərbaycanın həm tranzit ölkə, həm də böyük coğrafi məkanda iqtisadi inteqrasiyanı gücləndirən dövlət kimi geosiyasi mövqeyini daha da gücləndirir.
Elmir Heydərli
15:54 23.10.2025
Oxunuş sayı: 6557
