Səfir: Ukrayna ilə Azərbaycanı çoxəsrlik əməkdaşlıq və dostluq birləşdirir
Ukrayna və Azərbaycan xalqlarını
çoxəsrlik əməkdaşlıq və dostluq birləşdirir.
Crossmedia.az xəbər verir ki, bunu Ukraynanın
Azərbaycandakı səfiri Yuriy Qusev Ukraynanın müstəqilliyinin 34-cü ildönümü və
Müdafiəçilər Günü münasibətilə təşkil olunan diplomatik qəbulda bildirib.
"Azərbaycanın Ukraynanın
suverenliyi və ərazi bütövlüyünün müdafiəsində ardıcıl mövqeyini yüksək
qiymətləndiririk", – səfir vurğulayıb.
Qusev həmçinin qeyd edib ki,
Rusiya–Ukrayna müharibəsi şəraitində bu dəstək yalnız siyasi deyil, həm də
iqtisadi və humanitar baxımdan xüsusi əhəmiyyət daşıyır.
"Azərbaycanda Rusiya təcavüzündən
əziyyət çəkmiş ukraynalı uşaqlar üçün reabilitasiya və sağlamlaşdırma proqramı
həyata keçirilir. 2022-ci ildən bəri 402 uşaq Bakı, Qəbələ və Azərbaycanın
digər bölgələrini ziyarət edib. Bu ilin aprelində isə həlak olmuş ukraynalı
qəhrəmanların və əsirlərin övladları ilə birlikdə Azərbaycan və Ukraynanın
ortaq konsertini təşkil etdik", – səfir bildirib.
Qusev əlavə edib ki, Azərbaycan hökuməti
Ukraynada infrastrukturun və tibb müəssisələrinin bərpasına töhfə verir,
həmçinin enerji təhlükəsizliyinə, dərman və ilk zəruri məhsulların tədarükünə
dəstək göstərir.
"Bu, xalqlarımız arasında
həmrəyliyin və qardaşlığın əsl təzahürüdür. Biz Azərbaycan rəhbərliyinə və
xalqına səmimi təşəkkürümüzü bildiririk, bu dəstəyi yüksək
qiymətləndiririk".
Diplomat vurğulayıb ki, ötən il ərzində
Ukrayna və Azərbaycan siyasi, iqtisadi, diplomatik, mədəni və humanitar
sahələrdə strateji tərəfdaşlığın inkişafı və dərinləşdirilməsində yeni uğurlar
əldə ediblər.
O həmçinin söyləyib ki, iki ölkənin
liderləri mütəmadi olaraq təmas saxlayır, nazirlər və parlamentlər səviyyəsində
yüksək əməkdaşlıq mövcuddur.
Səfir energetika sahəsində əldə olunmuş
razılaşmaların, o cümlədən "Naftoqaz" və SOCAR arasında enerji
təhlükəsizliyi sahəsində müqavilənin əhəmiyyətini də vurğulayıb.
Sonda Qusev ikitərəfli münasibətlərin
daha da inkişaf edəcəyinə ümidvar olduğunu deyib.
00:13 02.10.2025
Oxunuş sayı: 729
